Бирлашган Миллатлар Ташкилотига ихтисослашган Жаҳон метеорология ташкилоти маълумотларига кўра, июль ойининг боши бутун сайёра учун рекорд даражадаги энг иссиқ ҳафта бўлди. Бу ҳақда The Guardian хабар берди.
“Қуруқлик ва океан ҳарорати ўз рекордларини янгилади, бу эса экотизим ва атроф-муҳитга ҳалокатли таъсир кўрсатиши мумкин”, — дейилади баёнотда.
2023 йил июнь ойи ҳам тарихдаги энг иссиқ ой бўлди, дейди БМТ расмийлари. Олимларнинг таъкидлашича, глобал юқори ҳароратга “Эл-Нинё” деб аталувчи ҳодиса (Экваториал Тинч океанининг марказий ва шарқий зоналарида сувнинг сирт қатлами ҳарорати аномал даражада ошиши билан тавсифланган табиий ҳодиса), доимий карбонат ангидрид чиқиндилари ажралиши ва иқлим ўзгариши сабаб бўлмоқда.
“Эл-Нинё” ҳодисаси 2-7 йилда бир марта содир бўлиб, 9 ойдан 12 ойгача давом этади.
“‘Эл-Нинё’ ривожланишда давом этар экан, янги рекордлар ўрнатилади, ушбу иқлим ҳодисасининг атроф-муҳитга таъсири кучаяди ва 2024 йилгача давом этади. Бу сайёра учун ташвишли хабар. Шу йил охирида унинг таъсирини чиндан ҳам ҳис қиламиз. ‘Эл-Нинё’ ҳали чинакамига ўсгани йўқ”, — деди ЖМТ иқлим бўйича директори Кристофер Хюитт.
Copernicus Evropa иқлим мониторинги хизмати маълумотларига кўра, ўтган ҳафта ҳарорат, кузатувлар бошланган 1940 йилдан бери энг иссиқ бўлди. 6 июль куни метеорологлар дунёдаги энг юқори ўртача ҳароратни қайд этди.
Изоҳ (0)