АҚШ молия вазирлиги Сербия разведка хизмати, Хавфсизлик ва ахборот агентлиги раҳбари Александр Вулинга нисбатан санкциялар жорий қилди. Бу ҳақда 11 июль куни вазирлик сайтида хабар берилди.
“Александр Вулин трансмиллий уюшган жиноятчилик, ноқонуний гиёҳванд моддалар савдоси ва мансаб ваколатини суиистеъмол қилиш билан шуғулланган”, — дейилади АҚШ Молия вазирлиги матбуот-релизида.
Вазирлик маълумотларига кўра, амалдор сербиялик қурол-яроғ сотувчиси Слободан Тешич билан “ўзаро манфаатли муносабатларни сақлаб турибди”, унга Сербия чегаралари бўйлаб “ноқонуний қурол-яроғ жўнатмаларининг тўсиқсиз айланишини таъминлашда” ёрдам бермоқда.
“Молия вазирлиги Ғарбий Болқонда самарали ва демократик бошқарувга путур етказган ва шахсий манфаати йўлида ўз мансабини суиистеъмол қилганларни жиноий жавобгарликка тортишдан иккиланмайди. Бугунги ҳаракат Александр Вулинни унинг коррупсион ва беқарор ҳаракатлари учун жавобгар, деб ҳисоблашимизни англатади, унинг ҳаракатлари Россиянинг минтақадаги ғаразли ҳаракатларига ҳам ҳисса қўшган”, — деди АҚШ Молия вазирлиги котибининг терроризм ва молиявий разведка бўйича ўринбосари Брайан Нельсон.
Маълумот учун, санкциялар рўйхатига тушган одамнинг АҚШдаги активлари музлатилади, унга Америка фуқаролари ва компаниялари билан бизнес юритиш тақиқланади.
Вулин Сербия Мудофаа вазирлиги ва Ички ишлар вазирлигини бошқарган
Вулин Сербия разведка хизматини бошқаришдан олдин 2017 йилдан 2020 йилгача мамлакат мудофаа вазири, 2020 йилдан 2022 йилгача эса Сербия ички ишлар вазири бўлган. У кремлпараст қарашларга амал қилади, Россиянинг Украинага босқини бошланганидан кейин у Сербия “Россияга қарши истерияга” қўшилмаслигини ваъда қилган.
Россиялик сиёсатчи ва журналист Владимир Кара-Мурзанинг айтишича, 2021 йилда Вулин Москвага келган ва у ерда Россия Хавфсизлик кенгаши котиби Николай Патрушев билан учрашган, шундан сўнг томонлар рангли инқилобларга қарши кураш бўйича қўшма ишчи гуруҳ тузилганини эълон қилган.
Изоҳ (0)