Бундан 40 йил илгари Бухоро вилоятида Ўзбекистон тарихидаги рекорд даражадаги иссиқ ҳарорат кузатилган. Бу ҳақда “Ўзгидромет” мутахассиси, иқлимшунос Эркин Абдулаҳатов Telegram’даги каналида маълум қилди.
1983 йилда Бухоро вилоятида республика тарихидаги рекорд ҳарорат, +49,9 даражали иссиқ кузатилган. 1914 йилда эса Сурхондарё вилояти Термиз шарида +49,6 даража иссиқ бўлган.
Тошкент шаҳрида эса 1997 йил 18 июлда термометр устунчаси +44,6 даража иссиқни қайд этган. Бу ўша давр учун сўнги 160 йиллик кузатувлар тарихидаги энг юқори, рекорд даражадаги иссиқ ҳароратдир.
Яқинда БМТнинг Жаҳон метеорология ташкилоти “Тинч океанининг тропик қисмида етти йил ичида биринчи марта ‘Эль-Ниньо’ шароити юзага келганини” эълон қилди. Бу эса глобал ҳароратнинг кескин ошиши ва об-ҳаво билан иқлимнинг ҳалокатли шароитларига замин яратади. “Эль-Ниньо” Тинч океани марказий ва шарқий тропикларида сув юзасидаги ҳароратнинг кўтарилиши билан боғлиқ иқлим режими ҳисобланади. Мазкур ҳодиса 2-7 йилда бир марта содир бўлиб, 9 ойдан 12 ойгача давом этади.
“Тошкент шаҳрида рекорд даражадаги энг иссиқ ҳарорат айнан ўтмиш Эль-Ниньё даврида кузатилган экан” — деб ёзади Эркин Абдулаҳатов.
Олимнинг қўшимча қилишича, Нукусдаги энг юқори ҳаво ҳарорати 2002 йил август ойида кузатилган бўлиб, иссиқлик +46,8 даражагача кўтарилган.
Изоҳ (0)