“Сирдарё вилоятида яшовчи 24 ёшли аёл ўзида ОИВ инфекцияси бўла туриб эркаклар билан жинсий алоқага киришгани аниқланди”, — деб хабар беради вилоят ИИБ ахборот хизмати.
Қайд этилишича, М.С. исмли аёл 2020 йил 13 февралда Сирдарё вилояти ОИTСга қарши курашиш маркази томонидан ОИВ инфекциясининг юқтирувчиси сифатида рўйхатга олинган. У бошқа шахсларга ОИВ инфекциясини юқтирган тақдирда жиноий жавобгарликка тортилиши тўғрисида тегишли тартибда огоҳлантирилган.
Шундай бўлса-да, аёл қасддан жиноят содир қилиш йўлига ўтиб, 2022 йил август ойидан 2022 йил декабрь ойига қадар бўлган вақт оралиғида Бухоро тумани ҳудудида жойлашган чўл зонасида 4 нафар фуқаро билан бирга бир неча маротаба жинсий алоқада бўлган. Аёл ўзида ОИВ инфекцияси борлигини олдиндан билган ҳолда ушбу касалликни бошқа шахсларга юқтиришга уринган.
Мазкур ҳолат юзасидан Жиноят кодексининг 113-моддаси (Таносил ёки ОИВ касаллиги/ОИTСни тарқатиш) 4-қисми билан жиноят иши қўзғатилиб, ҳозирги кунда дастлабки тергов ҳаракатлари олиб борилмоқда.
Маълумот учун, 2022 йилнинг 1 январь ҳолатига кўра, республикада рўйхатга олинган ОИВ билан касалланганлар сони 45 минг нафарни ташкил этмоқда. ОИВни юқтириб олган шахсларнинг аксарият қисми махсус антиретровирус даволаш билан қамраб олинган. Шундай муолажаларни олаётган шахсларнинг 74 фоизида вирус юкламаси бир неча марта камайган.
Изоҳ (0)