Сурхондарё вилоятининг Бандихон туманида фаолият юритувчи фермер туман прокуроридан калтак еганини айтмоқда. Бу ҳақда Telegram’даги “Муштум” журнали каналида хабар берилган.
Ўзини Чори Пиримқулов деб таништирган фермернинг айтишича, воқеа 2023 йилнинг 7 июль куни содир бўлган.
“Мен туман прокурори Саотмурод Маҳмановдан норозиман, бу кишининг олиб бораётган сиёсати, халққа ҳурматсизлиги ортиқча бўляпти”, — дейди фермер туман прокуроридан норозилигини айтар экан.
Фермер хўжалиги раҳбарининг айтишича, туман прокурори иккинчи сектор ҳудудидаги фермерларга 2 жуфт этик ва бир дона фонар олиб келиши кераклигини тайинлаган.
Туман прокурори айтган йиғилиш “Шоҳ баракат” фермер хўжалигига қарашли дала шийпонида бўлиши керак эди. Шу сабаб шийпонга саккиздан ўн дақиқа ўтганда бордим. Йиғилиш саккизда бошланиши айтилганди. Лекин мен этик топишга қийналганим боис кечикдим. Шунда прокурор нега кечикдинг, деб сўраганида саратонда резина этик топиш қийин бўлганини айтиб, узр сўрадим. Этикни олиб кел, деди. Олиб борсам, мени “чўчқа, чўчқадан тарқалган” дея ҳақоратлаб, “бу кийилган, эски этик экан”, деб ўша этик билан бошимга урди. Елкамга бир неча маротаба қўли билан ҳам урди. Шунингдек, “итдан тарқалган, чиққан жойингга тиқиб юбораман”, дея ҳақоратлади, — дейди фермер.
Фермер туман прокурорининг калтаги ва ҳақорати сабаб шаъни топталганини, барча танишларининг кулгисига қолаётганини айтиб, “ишлашдан кўнглим қолиб, эътиборим сусайиб қолди. Аёлим, фарзандларим ҳам ундан нафратланиб, ўзлари ҳозир чора кўриш даражасига етиб турибди”, — деди.
Фермер, шунингдек, прокурорнинг бу қилмишига жавобан унга етарли даражада жавоб беришга қодирлигини, аммо прокурор формаси сабаб бунга ботинолмаганини айтиб, “формага хиёнат қилишни ўзимга эп кўрмадим”, — демоқда.
Бандихон тумани прокурори Соатмурод Маҳманов тумандаги маҳалла раисларини ҳақорат қилиб, жамоатчиликка танилганди.
Мазкур аудиода прокурор тумандаги МФЙ раисларига “Эркакмисан сен ҳам? Хотинчалиш, итдан тарқалган экансан-да, бўлмаса одамнинг ишини қилардинг-да. Бор, бориб итга ўхшаб вовулла кўчада”, деганини, “Ўлсанг, бугун кўмар эдик”, “Итдан тарқаганмисан, одамдан тарқаганмисан?” дея ҳақорат қилганини эшитиш мумкин.
Бош прокуратура ахборот хизмати раҳбари Ҳаёт Шамсутдинов прокурорнинг ҳаракати ўрганилаётганини, тез орада ўрганиш натижалари ҳақида маълум қилишини билдирганди. Бироқ ўрганиш натижалари нима билан якунлангани ҳалигача жамоатчиликка номаълумлигича қолмоқда.
Изоҳ (0)