Наманган вилояти Янгиқўрғон туманида дугонасининг пластик картасидаги пулларни ечиб олган аёлга жиноят иши қўзғатилди. Бу ҳақда ИИВ Киберхавфсизлик маркази хабар берди.
Қайд этилишича, Янгиқўрғон туманида яшовчи фуқаро 18 ёшли Х.Ж. ариза билан мурожаат қилиб, Россиядан унга юборилган пуллар номаълум шахс томонидан яширин тарзда ечиб олинганини маълум қилган.
Ўтказилган тезкор-қидирув тадбирлари натижасида, ушбу жиноятни мазкур туманда яшовчи 23 ёшли (аёл) Э.Д. содир этгани аниқланган.
Унга кўра, Х.Ж. дугонаси Э.Д.га Россиядан унга пул юборилишни айтиб, банк картасидан фойдаланиб туришини сўраган. Фуқаро Э.Д.нинг банк картасига юборилган 2 миллион сўмдан ортиқ пулларни дугонаси Х.Ж.дан яширинча илова ёрдамида бошқа банк картасига ўтказиб, ўз эҳтиёжлари учун сарфлаб юборган.
Жиноят содир этган Э.Д. Жиноят кодексининг 169-моддаси (ўғрилик) 1-қисми билан жиноий жавобгарликка тортилган. Қонунчиликда бу каби жиноий ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.
Апрель ўрталарида Наманганда мактаб ўқувчиси устозининг пластик картасидан 2 миллион сўм ечиб олгани тўғрисида хабар берилганди. 2022 йил июлда эса Андижонда 8-синф ўқувчиси ўнлаб фуқароларнинг пулларини қўлга киритиб, PUBG ўйинига тикиб юборгани аниқланган эди.
Изоҳ (0)