Саудия Арабистонининг АCWА Power компанияси 2024 йил охиридан бошлаб Чирчиқ шаҳрида йилига 3 000 тонна “яшил” водород ишлаб чиқарадиган завод қуриши ҳақида хабар берилган эди. Ушбу завод қурилиши лойиҳаси бўйича янги келишувлар тузилди.
Инвестициялар, саноат ва савдо вазирлиги матбуот хизматининг хабар қилишича, 10 июль куни вазир Лазиз Қудратов АCWА Power компанияси бошқаруви раиси Муҳаммад Абунаян билан музокаралар ўтказди. Томонлар компаниянинг мамлакатимиздаги жорий лойиҳалари портфелини амалга оширишнинг долзарб масалаларини ҳамда энергетика ва кимё саноатида инвестициявий ҳамкорликни янада кенгайтириш истиқболларини муҳокама қилди.
Алоҳида тартибда бир қатор янги ташаббуслар кўриб чиқилди. Шу тариқа, томонлар зарур жараёнлар якунлангани ва йилига 3 минг тонна қувватга эга “яшил” водород ишлаб чиқарувчи завод қурилиши лойиҳаси бўйича янги келишувлар тузилганини олқишлади. Қурилиш ишлари 2023 йилнинг кузида бошланиши режалаштирилган.
Бугунги кунда АCWА Power компаниясининг Ўзбекистондаги инвестиция портфели умумий қиймати 6,8 миллиард доллардан ортиқ ва умумий қуввати 5,5 ГВт дан ортиқ бўлган 8 та лойиҳадан иборат. Сирдарё вилоятида қуввати 1,5 ГВт бўлган буғ-газ электр станциясини, Бухоро вилояти ва Қорақалпоғистон Республикасида умумий қуввати 2,6 ГВт га тенг шамол электр станциялари ҳамда Самарқанд ва Тошкент вилоятларида 1,4 ГВт қувватга эга қуёш станцияларини қуриш бўйича лойиҳаларни амалга оширишнинг долзарб масалалари юзасидан фикр алмашилди. Лойиҳаларни жадал ишга туширишни таъминлаш бўйича амалий чора-тадбирлар комплексини қабул қилишга келишилди.
Изоҳ (0)