Бухоро вилояти Вобкент туманида ижтимоий тармоқ орқали икки қудани чув туширган йигит икки йилдан сўнг топилди. Бу ҳақда вилоят ИИБ ахборот хизмати хабар берди.
Хабарга кўра, 2021 йилнинг 13 февраль куни Вобкент тумани “Ҳажувон” маҳалласида яшовчи, А.И. ўзининг телефон рақамига келган эълон орқали Telegramъдаги онлайн савдо каналига аъзо бўлган. Ўзини ушбу канал админи сифатида таништирган номаълум шахснинг алдовига учиб, савдо канали томонидан унга 500 000 сўм миқдоридаги пул ютуғини пластик картаси ҳисоб рақамига ўтказиб беришига ишонган.
Аёл унга ўзининг ҳамда қудасининг пластик карта рақамлари ва кодларини берган. Пластик карталарнинг рақами ва кодини олишга эришган номаълум шахс ўша вақтнинг ўзида жабрланувчи А.И.нинг пластик картасидан 644 000 сўм, қудасининг пластик картасидан эса 544 000 сўм пулларни ечиб олган.
Мазкур ҳолат юзасидан номаълум шахсга нисбатан Жиноят кодексининг 168-моддаси 1-қисми билан жиноят иши қўзғатилди. Олиб борилган тезкор техник ва суриштирув ҳамда тергов ҳаракатлари давомида ушбу жиноятни Тошкент вилояти Ўрта Чирчиқ туманида яшовчи, 2000 йилда туғилган А.А. содир қилгани фош этилди.
Ҳозирда ушбу шахснинг бошқа худди шу турдаги фош этилмасдан қолаётган жиноятларга алоқадорлигини аниқлаш юзасидан тезкор техник, суриштирув ҳамда тергов ҳаракатлари олиб борилмоқда.
Изоҳ (0)