Тошкент шаҳри ва Тошкент вилоятидаги ноқонуний чиқинди ташланадиган жойларга 25 та замонавий камералар ўрнатилди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати хабар берди.
Маълум қилинишича, ушбу камералар диспетчерлик ва онлайн мониторинг марказий бошқармаси томонидан онлайн режимда кузатилмоқда, доимий назоратда.
Шунингдек, бугунги кунда қўшимча 200 та кузатув камераси ўрнатиш ишлари олиб борилмоқда. Келгусида бутун республикада 1 000 га яқин камералар ўрнатилади. “Мақсад чиқиндиларни дуч келган жойга ташлаб кетиш ҳолатларига бутунлай чек қўйишдир”, — дейилади хабарда.
Вазирлик чиқиндиларни белгиланмаган жойларга ташлаш катта миқдорда жарима солинишига сабаб бўлишини эслатиб ўтган. Маъмурий жавобгарлик тўғрисидаги кодекснинг 91-моддасига кўра, саноат чиқиндиларини, маиший чиқиндиларни ва бошқа чиқиндиларни тўплаш, ташиш, жойлаштириш, зарарсизлантириш, сақлаш, утилизация қилиш, қайта ишлаш, реализация қилиш чоғида табиатни муҳофаза қилиш талабларини бузиш фуқароларга базавий ҳисоблаш миқдорининг уч бараваридан беш бараваригача (1 миллион 650 минг сўм), мансабдор шахсларга эса беш бараваридан етти бараваригача (2 миллион 310 минг сўм) миқдорда жарима солишга сабаб бўлади.
Худди шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилса, фуқароларга базавий ҳисоблаш миқдорининг беш бараваридан ўн бараваригача (3,3 миллион сўм), мансабдор шахсларга эса ўн бараваридан ўн беш бараваригача миқдорда жарима солинади.
Маъмурий жавобгарлик тўғрисидаги кодекснинг 91-1-моддасига кўра, белгиланмаган жойларга қаттиқ маиший чиқиндиларни ва қурилиш чиқиндиларини ташлаш, шунингдек, суюқ маиший чиқиндиларни тўкиш фуқароларга базавий ҳисоблаш миқдорининг бир бараваридан уч бараваригача, мансабдор шахсларга эса 10 бараваридан 20 бараваригача (6,6 миллион сўм) миқдорда жарима солишга сабаб бўлади.
Худди шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, фуқароларга базавий ҳисоблаш миқдорининг 5 бараваридан 10 бараваригача, мансабдор шахсларга эса 20 бараваридан 30 бараваригача (9,9 миллион сўм) миқдорда жарима солинади.
Маиший ва қурилиш чиқиндилари полигонларига жойлаштирилиши керак бўлган чиқиндиларни белгиланмаган жойларга ташлаш фуқароларга базавий ҳисоблаш миқдорининг беш бараваридан 10 бараваригача, мансабдор шахсларга эса 20 бараваридан 30 бараваригача миқдорда жарима солишга сабаб бўлади.
Бу ҳуқуқбузарлик маъмурий жазо чораси қўлланилганидан кейин бир йил давомида такрор содир этилса, маъмурий ҳуқуқбузарликни содир этиш қуроли бўлган ашёни мусодара қилиб, фуқароларга базавий ҳисоблаш миқдорининг 10 бараваридан 15 бараваригача, мансабдор шахсларга эса 30 бараваридан 50 бараваригача (16 миллион 500 минг сўм) миқдорда жарима солинади.
Ўзбекистонда чиқинди полигонлари
Ўзбекистонда 2023 йилда қурилиш чиқинди полигонларини қуриш учун бюджетдан қарийб 28 миллиард сўм, тиббиёт чиқиндиларини зарарсизлантириш участкаларини қуриш учун 50 миллиард сўм ажратилади.
2023—2025 йиллар учун тасдиқланган манзилли дастурларга асосан 29 та қаттиқ маиший чиқинди полигонини рекултивация қилиш, 437 та чиқинди йиғиш шохобчаларини қуриш, 26 та қурилиш чиқинди полигонини ташкил этиш, ижтимоий соҳа объектларига 18 867 та чиқинди контейнери харид қилиш, 38 та қаттиқ маиший чиқиндиларни қайта юклаш станциясини ташкил этиш, 60 та тиббиёт чиқиндиларини зарарсизлантириш участкасини ташкил этиш ҳамда саралаш ускуналарини ўрнатиш учун жами 1,1 триллион сўм маблағлар молиялаштирилиши режалаштирилмоқда.
Изоҳ (0)