Варикоз қон томирлар тана бўйлаб қонни самарали ҳаракатлантира олмаса, айниқса, тез ривожланади. Томирлар буришиши ёки уларнинг ички тузилишига зарар етиши мумкин. Бунга йўл қўйиб бўлмайди, деб ёзади Woman нашри.
Варикозга бепарво муносабатда бўлманг
Варикоз касаллигининг энг аҳамиятсиз сигналларини ҳам эътиборсиз қолдириб бўлмайди. Оёқлардаги варикоз бир қатор симптомларни келтириб чиқаради, уларнинг энг кўзга ташланадигани терининг юзасида, одатда оёқнинг пастки қисмларида томирларнинг пайдо бўлишидир. Бу қон терининг юзасига яқин жойда тўпланиши натижасида содир бўлади. Бундан ташқари, варикоз бўлган одамларда шиш пайдо бўлиши, зарарланган ҳудудда оғирлик ҳисси ва қон оқимининг бузилиши туфайли яралар ҳосил бўлиши мумкин.
Бир қатор омиллар варикознинг ривожланиш хавфини оширади. Бунда жинс ва ёш катта рол ўйнайди. Кекса аёллар бу касалликка эркаклар ва ёш аёлларга қараганда тез-тез дуч келишади.
Бундан ташқари, тана вазни ҳам аҳамиятга эга — юқори тана массаси индексига эга бўлган одамларда бу касаллик кўпроқ учрайди.
Қандай йўл тутиш керак ҳамда варикозда нималар қилиш мумкин эмас?
Варикозда бошқа касалликлар сингари беморга қўлланадиган бир қатор чекловлар мавжуд. Масалан, варикозда оёқларни жисмоний фаолият билан ортиқча зўриқтирмаслик керак. Бу спортни бутунлай чиқариб ташлашингиз керак дегани эмас, фақат юк оптимал бўлсин. Бошқа томондан варикозда оёқларни бутунлай пассив қолдира олмайсиз. Оёқ-қўлларнинг ҳаракати мос равишда қон айланишига ёрдам беради. Агар биз ҳаракатсиз турмуш тарзини олиб борсак, пастки оёқларда қон босими кўтарилади. Бизга нима ёрдам беради ва нима зарар келтиради?
Варикоз билан югуролмайсиз, сакролмайсиз. Классик аэробика, арқон, жанг санъати дарслари, ирландча ва африканча каби рақсларга хайр дейсиз, чунки бу рақс ва спорт турларида сакраш кўп. Бундан ташқари, куч талаб этиладиган статик машқларда қатнашиш мумкин эмас.
Эсингизда бўлсин: варикоз томирлари билан одатда 3-5 кг дан ортиқ юкни кўтариш мумкин эмас. Шунинг учун спорт залида варикоз томирлари билан оғриган беморлар билан ишлаш учун махсус тайёргарликдан ўтган мураббий назорати остида машқ қилиш яхшидир. Чўмилиш ҳавзаларига боришингиз мумкин, ўтириш ёки ётган ҳолда бажарилиши керак бўлган машқларга, ёга, пилатес машғулотларига рухсат берилади. Варикозда массажнинг айрим турлари ҳам ман этилган.
Ниҳоят, варикозда ўз вазнингизни назоратсиз қолдира олмайсиз. Нотўғри овқатланиш, унинг ҳаддан ташқари ҳолатлари семиришга олиб келиши мумкин. Ва бу оёқларга қўшимча юк орттиради. Рациондан жуда юқори калорияли овқатларни чиқариб ташлаш тавсия этилади. Рационга киритилиши керак бўлган нарса C витаминини ўз ичига олган овқатлардир. Бу томирларни мустаҳкамлайди ва уларнинг эластиклигини оширади. C витаминига бой овқатлар апелсин, қулупнай ва папайя ҳисобланади.
Изоҳ (0)