Тошкент аҳолиси сув ҳисоблагичларни ўрнатиш орқали қанча маблағ тежаши мумкин?

“Ўзсувтаъминот” АЖ ахборот хизмати Тошкент шаҳри аҳолиси сув ҳисоблагичларни ўрнатиш орқали қанча маблағ тежаши мумкинлиги ҳақида маълумот берди.

Қайд этилишича, бугунги кундаги белгиланган меъёрлардан келиб чиққанда, ҳовлили хонадонларга бир киши учун бир ойга 12 минг 242 сўм сув ҳақи тўланади. Бу ўртача 5 кишилик оила учун ойига қарийб 61 минг 213 сўмга тушади, йиллик харажат эса 734 минг 562 сўмга айланади. Оқова сувсиз хонадонлар учун киши бошига ойлик тўлов 7 минг 452 сўм этиб белгиланган. Бунинг учун беш кишилик оила ойига 37 минг 260 сўм тўлаши лозим. Бир йилда эса сув учун 447 минг 126 сўм харажат қилади. 

Бундан ташқари, ҳар метр квадрат бўш ерга 319 минг йиллик тўлов қилиш ҳисоблагичсиз хонадонлар учун мажбурий ҳисобланади. Агар умумий харажат ҳисобланса, оила бюджетига сезиларли даражада зарар етиши мумкин. Кўп қаватли уйларда ҳисоблагич ўрнатилмаган тақдирда, киши бошига 17 минг 33 сўм тўлов ундирилади. 5 кишилик оила учун ойига 85 минг 166 сўмга, йилига эса 1 миллион 021 сўмга тушади. 

Ҳисоблагич асосида харажатлар ҳисобланганда эса қуйидагича бўлади. Оқова сувли хонадонлар бир куб метр сув учун 950 сўм ҳақ тўлайди. Агар бир кунда умумий 1 куб метр сув ишлатилса, беш кишилик оила учун ойига 28 минг 500 сўмга, йилига эса 342 минг сўмга айланади. Оқова сувсиз хонадонлар эса ҳар куб метр сув учун 500 сўмдан ҳақ тўлайди.