Ўзбекистоннинг Жидда шаҳридаги Бош консуллигида саудиялик тадбиркор Бассам ал-Саади билан музокаралар ташкил этилди, деб хабар беради “Дунё” агентлиги.
Қайд этилишича, учрашув чоғида Ўзбекистон сайёҳлик инфратузилмасини ривожлантиришга хорижий инвестицияларни жалб этиш масалалари муҳокама қилинган. Саудия Арабистони вакилига Ўзбекистонда амалга оширилаётган кенг кўламли ўзгаришлар, иқтисодиётни либераллаштириш ва ташқи савдони ривожлантириш бўйича ислоҳотлар, хорижий инвесторлар учун яратилган бизнес-қулайликлар ҳақида батафсил маълумот берилган.
Бассам ал-Саади ўз навбатида, Ўзбекистон Бош консулхонаси кўмагида мамлакатдаги бизнесини янада кенгайтириш ва мустаҳкамлашга ҳаракат қилаётганини билдирган.
“Биз ҳамкорларимиз билан Фарғона шаҳрида туристик дам олиш масканини барпо этиш лойиҳаси учун 3 миллион доллар миқдоридаги маблағни киритишни режалаштиряпмиз. Ушбу дам олиш маскани лойиҳасида 5 та катта вилла, 9 дона ўрта ва 15 та кичик виллалар ҳамда савдо маркази ва болалар ўйингоҳи қурилиши назарда тутилмоқда”, — дейди у.
Учрашув натижасида саудиялик тадбиркор билан Ўзбекистондаги бошқа лойиҳаларга ҳам инвестиция киритиш имкониятларини ўрганиш бўйича келишиб олинган.
Бундан олдин Тошкент вилояти Бўстонлиқ туманидаги “Анҳор сайли” (собиқ “Азиз” ва “Казбек”) дам олиш оромгоҳлари кимошди савдосида сотилгани тўғрисида хабар берилганди. Март ойида эса Миллий банкнинг дам олиш маскани қарийб 80 миллиард сўмга сотилган, июль бошида бўлса, “Сижжак” ва “Чотқол” дам олиш масканлари хусусийлаштириладиган объектлар рўйхатидан чиқарилган эди.
Изоҳ (0)