Ўзбекистонда олий таълим муассасалари (ОТМ) кўпайгани сари чет элга бориб, ўқиётган ёшлар сони камаймоқда. Бу ҳақда олий таълим, фан ва инновациялар вазирининг биринчи ўринбосари Комилжон Каримов “Марказий Осиё олий таълим хаби(марказ) сифатида” халқаро анжумани доирасида “Дарё” нашрига берган интервьюсида маълум қилди.
Комилжон Каримовнинг айтишича, дунёда олий таълим хабларининг турли моделлари мавжуд.
“Давлатлар хаб яратишда олдига аниқ бир мақсад қўйган. Айримлари ўзида миллий салоҳиятни халқаро ҳамкорлик орқали ривожлантиришга уринади. Масалан, Малайзия ҳудди шундай. Дубайда эса кўпроқ хориждан талабаларни жалб қилишга эътибор берилади. Чунки у ерда аҳоли кам, 90 фоиз аҳолиси хориждан келган. Шунинг учун уларнинг мақсади хориждан иқтидорли ёшларни таълимга жалб қилишдан иборат. Бизга Малайзия хаби яқинроқ. Бугунги кунда республикамизда 30 дан ортиқ хорижий ОТМлар ўз филиалини очган. Хорижий экспертлар Ўзбекистоннинг мазкур жиҳатини эътироф этишяпти, ўрганиш учун жуда муҳим дейишяпти”, — деди вазир ўринбосари.
Комилжон Каримов суҳбат давомида хорижда неча нафар ўзбекистонлик ёшлар ўқиётганини ҳисоб-китоб қилиш қийин масала эканини айтди.
“Афсуски, хорижга чиқаётган ёшлар қайси ўқишга кетаётгани бўйича статистика олиб борилмайди. Лекин тахминларимиз бор. Ҳозирда хорижда ўқиётган фуқароларимизнинг катта қисми Марказий Осиё давлатларидаги ОТМларда таҳсил оляпти. Аксарият талабалар Қозоғистон, Қирғизистон ва Россияда ўқияпти”, — деди у.
Вазир ўринбосарига кўра, охирги йилларда Ўзбекистондаги ОТМлар сони кўпайгани сари четга чиқиб ўқувчилар сони камаймоқда.
“Чунки ўзимизда имконият яратилмоқда. Хусусий олий таълим муассасалари очиляпти. Уларнинг сони ҳозир 65 тага етди. Хусусий ОТМларда 125 минг нафардан ортиқ талабалар таҳсил оляпти. Бу катта сон”, — деди Комилжон Каримов.
Олий таълим, фан ва инновациялар вазирлиги берган маълумотга кўра, Ўзбекистонда сўнгги беш йил ичида 100 дан ортиқ янги университетлар очилган. Мамлакатда ҳозир жами 210 та ОТМ фаолият юритмоқда.
Изоҳ (0)