Исроилда шанбадан якшанбага ўтар кечаси ҳуқуқий ислоҳотларга қарши кенг кўламли норозилик намойиши бўлиб ўтди, унда 180 мингга яқин одам қатнашди, деб ёзади Times of Israel газетаси.
Crowd Solutions маълумотларига кўра, Тель-Авивдаги намойишда 140 мингга яқин одам қатнашган, ташкилотчилар эса 180 мингга яқин одам кўчага чиққанини айтишмоқда. Бир неча ўн минглаб бошқа исроилликлар мамлакатнинг бошқа ҳудудларида ўтказилган намойишларда қатнашди.
Мудофаа вазири Йоав Галантнинг Амикам шаҳридаги уйи олдига бир неча минг захирадаги зобитлар тўпланиб, ҳуқуқий ислоҳотларга қарши фикр билдиришга чақиришди. Улар якшанба куни тунги соат 3:00 гача у ерда қолишди.
Март ойи охирида Галант ҳукуматни ислоҳотни тўхтатишга чақирган Вазирлар маҳкамасидаги биринчи амалдор бўлганди. Намойишчилар Қуддусдаги бош вазир Бенямин Нетаняхунинг қароргоҳига ҳам боришган.
Тель-Авивдаги асосий норозилик намойиши тугагач, баъзи намойишчилар шаҳарлараро магистрал йўлларни тўсиб қўйишга ҳаракат қилишди, бироқ полиция уларни тарқатиб юборди.
Изоҳ (0)