Chotqol qo‘riqxonasida sodir bo‘lgan yong‘in vertolyotlar yordamida o‘chirildi (video)

Chotqol qo‘riqxonasiga qarashli hududda yong‘in sodir bo‘lgani haqida xabar berilgan edi. FVV matbuot xizmati ushbu yong‘in haqida ma’lumot berdi.

Unga ko‘ra, kichik yong‘in 8-iyul kuni kechasi Chotqol davlat biosfera qo‘riqxonasining Maydontol bo‘limi hududida sodir bo‘ldi. Favqulodda vaziyatlar vazirligining O‘rmon yong‘inlarini bartaraf etish maxsus otryadi zudlik bilan voqea joyiga yetib bordi.

Qisqa vaqt ichida FVV xodimlarining tezkor va malakali harakatlari natijasida yong‘in o‘chirildi va shu orqali o‘rmonning katta hududiga tarqalishi mumkin bo‘lgan yong‘inning oldi olindi. Jarayonga Mudofaa vazirligi, shuningdek, Ekologiya, atrof-muhitni muhofaza qilish va iqlim o‘zgarishi vazirliklarining kuch va vositalari ham jalb etildi.

Telegram’dagi “Novosti Tashkentskogo neba” kanalining yozishicha, yong‘inni o‘chirishga Н-215М Super Puma va H-125 vertolyotlari jalb etilgan.

Yong‘inni bartaraf etish jarayoni favqulodda vaziyatlar vaziri A.X.Qo‘ldoshev tomonidan nazoratga olindi.

Iyul oyining boshlarida Toshkent viloyati Piskent tumanidagi o‘rmonzorlarda yong‘in sodir bo‘lgandi. Holat yuzasidan Jinoyat kodeksining 198-moddasi (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) va 207-moddasi (mansabga sovuqqonlik bilan qarash) bilan jinoyat ishi qo‘zg‘atilgan. Bosh prokuratura tomonidan mazkur jinoyat ishi tergovi ustidan nazorat o‘rnatilgan.