ЕХҲТ ДИИҲБ миссияси раҳбари Урсула Гачек ОАВ вакилларига берган интервьюсида Ўзбекистон президенти сайлови жараёнларини синчиклаб таҳлил қилишга асосий диққат-эътибор қаратилишини айтди.
Унинг қайд этишича, Ўзбекистон президенти сайловларида 250 нафар халқаро кузатувчи иштирок этмоқда. Кузатувчилар Тахтакўпир сингари энг олис ҳудудларда ҳам иш олиб боряпти.
“Бутун ишимизни умумлаштириб айтадиган бўлсам, биз қатъий белгиланган, аниқ методологияга, юз бераётган жараёнларни тўлиқ қамраб олишга ва синчиклаб таҳлил қилишга асосий диққат-эътиборимизни қаратамиз”, — дейди Урсула Гачек.
ЕХҲТ ДИИҲБ миссияси раҳбарининг маълум қилишича, улар 4 та турли жиҳатларни кузатмоқда. Кузатувчилар махсус электрон ручкалардан фойдаланади. Унинг тугмачасини босганда маълумотлар қабул қилиб олинади.
“Вакилларимиз участкаларда жараён бошланишидан бир соат аввал кузатувга киришди ва тайёргарлик ҳолатига ҳам гувоҳ бўлди. Кузатувчилар участкаларнинг очилишига тайёргарлик жараёни бўйича юздан ортиқ бланкаларни тўлдириб беришди. Ушбу ҳужжатлар бизнинг статистика билан шуғулланувчи жамоамиз томонидан ўрганиб чиқилмоқда”, — дейди ЕХҲТ ДИИҲБ миссияси раҳбари.
Унинг билдиришича, кун давомида кузатувларга доир мингга яқин, балки ундан ҳам кўп ҳисоботлар тақдим этилади. Улар турли йўналишларга тегишли: бюллетенлар, бюллетен қутилари ва ушбу муҳим сиёсий жараённинг бошқа жиҳатлари.
“Биз барча маълумотларни онлайн режимида бериб боряпмиз ва улар дарҳол таҳлил қилинмоқда. Кеч соат 8 дан кейин участкалар ёпилгач, овозларни санаш устидан кузатув давом эттирилади. 14 та округ участкаларидаги жараён ҳам кузатувларда муҳим ўрин тутади. Бунда, маълумотларни Марказий сайлов комиссиясига узатиб берувчи округ сайлов комиссияларининг хатти-ҳаракатлари таҳлил қилинади”, — деди ЕХҲТ ДИИҲБ миссияси раҳбари Урсула Гачек.
Маълумот учун, 14 та сайлов округи ва 10 минг 784 та сайлов участкаси тузилди. Сайлов жараёнини 47 та давлат ва 15 та нуфузли халқаро ташкилотдан жами 797 нафар халқаро кузатувчи бевосита кузатиб бормоқда. Сайловда овоз бериш соат 08:00 дан 20:00 гача ўтказилади.
Изоҳ (0)