Қорақалпоғистоннинг Элликқалъа туманида “Ёшлар келажагимиз” Давлат дастури доирасида 2019 йилда ажратилган кредит маблағлари талон-торож қилиниб, қурилиш ишлари бугунги кунгача якунланмагани ҳақида хабар тарқалди. Қорақалпоғистон прокуратураси ҳолат юзасидан баёнот берди.
Унга кўра, 2023 йил март ойида Департаментнинг Элликқалъа туман бўлими томонидан “Ёшлар келажагимиз” Давлат дастури доирасида ажратилган кредитларнинг қонунийлигини ўрганиш мақсадида терговга қадар текширув ўтказилгани аниқланган. 2019 йилда АТ Халқ банк Элликқалъа филиали томонидан “Тупроққалъа Тур” МЧЖга юқоридаги давлат дастури доирасида “Экотуризм маскани” ташкил қилиш мақсадида 1 миллиард 850 миллион сўм имтиёзли кредит маблағлари ажратилган.
Ушбу кредит “Экотуризм маскани”ни қуриш учун ҳақиқатда ишлатилгани назорат ўлчовидан ўтказилганда, ажратилган кредит маблағлари тўлиқ ушбу объектнинг қурилиши учун сарфлангани аниқланган, шу билан бирга тадбиркор шахсий маблағлари ҳисобидан қўшимча 5,5 миллиард сўмлик қурилиш ишларини бажарган. Бугунги кунда ушбу объектнинг қурилиши учун жами 7 миллиард сўмдан ортиқ маблағлар сарфланган.
Терговга қадар текширув натижасига кўра, имтиёзли кредитнинг мақсадсиз ишлатилиш ҳолатлари аниқланмагани боис, 18 июнда Жиноят процессуал кодексининг 83-моддаси 2-бандига асосан жиноят иши қўзғатишни рад қилиш тўғрисида қарор қабул қилинган. Ушбу қарорнинг қонунийлиги ўрганилганда, бекор қилиш учун асослар аниқланмади.
Бироқ, тадбиркор барча маблағларини юқоридаги қурилиш объектига сарфлаб, ажратилган кредитни ўз вақтида қайтармагани сабабли, АТ Халқ банк Элликқалъа филиали томонидан Беруний туманлараро иқтисодий судига даъво аризаси киритилган.
Суднинг 2022 йил 17 июндаги қарорига кўра, қарздор “Тупроққалъа Тур” МЧЖдан банк фойдасига 1 миллиард 907 миллион сўм ундириш белгиланган. Ҳозирда, мажбурий ижро бюросининг Элликқалъа туман бўлими томонидан ижро ҳаракатлари олиб борилмоқда.
Изоҳ (0)