Польша президенти Анжей Дуда Украина соддалаштирилган тартиб асосида НАТОга қабул қилинишига умид қилмоқда.
“Умид қиламизки, иттифоқчиларимиз Украина НАТОга аъзо бўлиш учун унга ҳеч қандай дастлабки қадамлар керак эмаслиги тўғрисида қатъий қарор қабул қилишади, Украина соддалаштирилган тартибда НАТОга қабул қилинади”, — деди Дуда.
“Украинага нисбатан иттифоқчилар бирдамлигини яна бир бор тасдиқлашимиз биз учун жуда муҳим”, — дея қўшимча қилди Дуда.
Аввалроқ Владимир Зеленский агар Украина июль ойида Вильнюсда бўлиб ўтадиган саммитда НАТОга таклиф ололмаса, бу Украина қўшинларини руҳий тушкунликка олиб келишини айтган эди. Унинг сўзларига кўра, у Европа давлатлари раҳбарлари, АҚШ президенти Жо Байден, НАТО бош котиби Йенс Столтенберг билан бир неча бор гаплашган ва улардан Украинани қўллаб-қувватлашни сўраган.
19 июнь куни Столтенберг Вильнюсдаги саммитда ва унга тайёргарлик жараёнида иттифоқчилар Украинага расмий таклиф масаласини муҳокама қилмаётгани, балки Киевни альянсга қўшилишга яқинлаштирадиган қарорлар бўйича маслаҳатлашувлар ўтказаётганини айтганди.
Изоҳ (0)