Андижон вилоятида 32 ёшли фуқарони уриб ўлдиришда айбланиб, суд қилинган 12 нафар ИИБ ходимининг 10 нафари Жиноят ишлари бўйича Ангрен шаҳар судининг 2023 йил 22 май куни ўқилган ҳукмидан норози бўлиб, Тошкент вилояти судининг аппеляция инстанциясига шикоят қилган. Уларнинг шикояти судья Саидаҳрор Умаров раислигида кўриб чиқилмоқда.
Маълум қилинишича, тергов ҳибсхонасининг судга тортилган 12 нафар ходимидан 10 нафари ўзларига тайинланган ҳукмдан норози бўлиб, Тошкент вилоят судининг апелляция инстанциясидан нажот сўрамоқда.
5 июль куни бўлиб ўтган суд мажлисида суд ҳайъати адвокатлар таркиби тўлиқ бўлмаганлиги боис, ОАВ, хусусан “Дарё” интернет нашри журналистига судда шунчаки тингловчи сифатида иштирок этишга рухсат берди. 2023 йилнинг 12 июль куни давом этадиган навбатдаги суд мажлисида адвокатлар ва томонлар фикрини билгач, шунга қараб фото, видео ҳамда аудиоматериаллар олинишига рухсат бериш-бермаслик масаласи ҳал этилишини маълум қилди.
Эслатиб ўтамиз, Андижон вилоятининг Шаҳрихон туманида яшаган 32 ёшли С.М. 2022 йил 21 март куни ИИБ ходимлари ва бир нафар маҳкум томонидан қийноққа солиниши оқибатида тергов ҳибсхонасида вафот этганди. Суд марҳумнинг ўлимига сабабчи деб топган ИИВ ЖИЭДга қарашли 3-сон тергов ҳибсхонасида ишловчи 6 нафар ходимнинг ҳар бирини 1 йил 6 ой муддатга ички ишлар органлари тизимида ишлаш ҳуқуқидан маҳрум қилган ҳолда 4 йил муддатга озодликдан маҳрум қилганди. Шунингдек, қолган 6 нафар ходим эса 1 йил 6 ой муддатга ички ишлар органлари тизими ва шифокорлик лавозимларида ишлаш ҳуқуқидан маҳрум этилиб, 3 йилга озодликни чеклаш жазоси билан жазоланганди. Бундан ташқари, марҳум маҳбусни камерада калтаклаган маҳкум Ж.У.га 4 йил 1 ой муддатга озодликдан маҳрум қилиш жазоси тайинланган.
Судда марҳумнинг онаси Юлдузхон Султонова ҳамда озодликдан маҳрум қилинган ИИБ ходимларининг яқинлари ҳам иштирок этмоқда. “Дарё” журналисти марҳумнинг онаси ва судланганларнинг яқинларига ҳам микрафон тутиб, уларнинг фикрини ўрганди. Бу ҳақда “Дарё”да кейинроқ батафсил ўқишингиз мумкин бўлади.
Изоҳ (0)