Президент томонидан “Ўзбекистон Республикаси Мудофаа вазирлиги ҳузуридаги Жамоатчилик кенгаши фаолияти самарадорлигини ошириш чора-тадбирлари тўғрисида”ги фармон имзоланди, деб хабар беради Norma.
Жамоатчилик кенгашининг асосий вазифалари:
- мудофаа ва ҳарбий соҳада жамоатчилик ҳамда халқаро ҳамжамият томонидан билдирилган таклифларни таҳлил қилиш;
- Мудофаа вазирлигини фуқаролар билан боғлаб турувчи “кўприк” вазифасини бажариш;
- ҳарбий хизматчилар ижтимоий- ҳуқуқий жиҳатдан ҳимоя қилиш бўйича тегишли дастурларнинг бажарилишини комплекс таҳлил қилишда иштирок этиш;
- ҳарбий хизматдан резерв (захира)га бўшатилган фуқароларнинг ижтимоий ва профессионал мослашуви ҳамда бандлиги билан боғлиқ, масалаларни ҳал этишда бевосита иштирок этиш;
- Мудофаа вазирлигига норматив-ҳуқуқий ва бошқа ҳужжатлар лойиҳаларини ишлаб чиқишда кўмаклашиш;
- ёшларни ватанпарварлик, истиқлол ғояларига садоқат руҳида тарбиялаш ишларини мувофиқлаштириб боришда иштирок этиш.
Жамоатчилик кенгаши ўз фаолиятини жамоатчилик асосида олиб борадиган маслаҳат-кенгаш органи ҳисобланади.
Жамоатчилик кенгашининг қарори кенгаш мажлисида иштирок этаётган аъзоларнинг кўпчилик овози билан қабул қилинади. Жамоатчилик кенгашининг ҳар бир аъзоси мажбурий равишда қабул қилинаётган қарор бўйича ўзининг алоҳида фикрини ёзма шаклда ифодалашга ҳақли. Жамоатчилик кенгашининг қарори тавсиявий хусусиятга эга.
Ҳужжат билан:
- Мудофаа вазирлиги ҳузуридаги Жамоатчилик кенгашининг янгиланган таркиби;
- Қорақалпоғистон Республикаси Вазирлар Кенгаши ва вилоятлар ҳокимликларида Жамоатчилик кенгашининг ҳудудий бўлинмаларининг намунавий таркиби;
- Жамоатчилик кенгаши тўғрисида низом тасдиқланмоқда.
Мудофаа вазирлиги Жамоатчилик кенгаши раиси этиб, Қонунчилик палатаси депутати Иқбол Мирзаалиев тайинланган.
Ҳужжат Қонунчилик маълумотлари миллий базасида эълон қилинган ва 13 апрелдан кучга кирган.
Март ўрталарида “Ватан ҳимояси ва эл-юртимиз тинчлиги йўлида ҳалок бўлган ҳарбий хизматчилар ва ходимлар оила аъзоларини ижтимоий қўллаб-қувватлашни кучайтириш чора-тадбирлари тўғрисида”ги президент фармони қабул қилинганди. Унга кўра, ҳарбий хизматчиларнинг (ходимларнинг) давлат мажбурий шахсий суғуртаси доирасида ҳарбий хизматчи (ходим) ҳалок бўлганда тўланадиган суғурта суммаси базавий ҳисоблаш миқдорининг 200 баравари миқдорида этиб белгиланган.
Изоҳ (0)