Хитой—АҚШ муносабатлари икки давлат ўртасида дипломатик алоқалар ўрнатилганидан бери энг паст даражага тушди, деди Хитой ташқи ишлар вазири Син Ган АҚШ Давлат котиби Энтони Блинкен билан учрашувда.
“Ҳозирда Хитой ва АҚШ муносабатлари мамлакатларимиз ўртасида дипломатик муносабатлар ўрнатилганидан бери энг паст даражада. Бу Хитой ва АҚШ халқлари манфаатларига тўғри келмайди”, — дея унинг сўзларини келтирди Хитой марказий телевидениеси.
Хитой ТИВ раҳбари мамлакатлар ўртасидаги сиёсий зиддият бошқа давлатларга ҳам фойда келтирмаслигини таъкидлади.
“Америка томони Хитойга нисбатан холис ва оқилона позицияни сақлаб қолади, деб умид қиламиз”, — деди вазир.
Син Ган Хитой—АҚШ муносабатларидаги асосий муаммо Тайван эканлигини қўшимча қилди. Унинг таъкидлашича, АҚШ орол мустақиллигини қўллаб-қувватламаслиги керак.
“Тайван муаммоси Хитой манфаатларининг асосини ташкил этади, бу Хитой—АҚШ муносабатларидаги энг катта муаммо, шунингдек, энг катта хавфдир”, — деб хулоса қилди Ган.
Ўз навбатида, АҚШ Давлат департаменти музокараларни “конструктив, пухта ва самимий” деб баҳолади.
Энтони Блинкен учрашувда Америка томони халқаро тартиб ўрнатишга интилиш билан бирга ўз мамлакати ва фуқаролари манфаатларини ҳимоя қилишини таъкидлади. У тушунмовчиликларга йўл қўймаслик учун турли масалалар бўйича очиқ мулоқот каналларини сақлашга чақирди, шунингдек, Син Ганни музокараларни давом эттириш учун Вашингтонга таклиф қилди.
АҚШ Давлат котиби Энтони Блинкен 18 июнь якшанба куни Пекинга келганди.
У февраль ойида мамлакатга ташриф буюриши керак эди, бироқ АҚШ осмонида Хитойнинг “жосус” ҳаво шари топилгач, сафарни бекор қилди. Financial Times ўз манбаларига таяниб ёзишича, ташриф чоғида Давлат департаменти раҳбари Хитой раиси Си Цзиньпин билан учрашиши режалаштирилган.
Изоҳ (0)