Андижон вилояти ҳокими Шуҳрат Абдураҳмонов 26 июнь куни ўтказган “Ҳокимлик соати”да уйи ёниб кетган журналистга 27 июнь — Матбуот ва оммавий ахборот воситалари ходимлари куни муносабати билан янги уй совға қилишини маълум қилди. Бу ҳақда “Дарё” мухбири Умиджон Мамарасулов хабар бермоқда.
“Ҳокимлик соати” аввалида вилоят раҳбари ҳудудда фаолият олиб бораётган, босма ва электрон оммавий ахборот воситалари ходимлари, нашриёт, почта ва матбуот тарқатувчи ташкилотлар ходимлари, соҳага алоқадор барча ташкилот ва муассасалар вакилларини байрам билан табриклаб, Андижонни ҳар тарафдан юксалтиришда уларга таянишини маълум қилган.
Шунингдек, матбуот хизматлари фаолиятини ривожлантириш ҳамда уларни ОАВ ва жамоатчилик билан ҳамкорликда ишлаш бўйича бир қанча таклиф ва ташаббусларни илгари сурган.
“Бундан кейин ҳар ҳафтада бир маротаба ҳудудларда пресс-тур ва матбуот анжуманлари ўтказилади. Ой якунида эса очиқликни таъминлаш бўйича қилинаётган ишлар муҳокама қилиниб, вилоят ва ҳудудлар кесимида мавжуд камчиликларни бартараф этиш бўйича журналист ва блогерларнинг танқидий-таҳлилий фикрлари эшитилиб, муаммоларни бартараф этиш бўйича ишлар тизимли назоратга олинади”, — деган Шуҳрат Абдураҳмонов.
Йиғилиш давомида вилоят ҳокими жорий йилнинг 24 июнь куни Андижон шаҳрининг “Ўзгариш” маҳалласида содир бўлган ёнғин оқибатида яшаб турган уйи ёниб кетган ва турар жой муаммосига дуч келган вилоят Мажбурий ижро бюроси ахборот хизмати раҳбари Ойиста Абдураҳмоновага ҳар томонлама ёрдам кўрсатилишини айтиб, янги уй совға қилинишини билдирган. Ойиста Абдураҳмонованинг Шуҳрат Абдураҳмоновга қариндошлик жойи йўқ.
Изоҳ (0)