Шимолий Корея пойтахти Пхеньян шаҳрида Корея уруши бошланганининг 73 йиллигига бағишлаб Америкага қарши шиорлар остида оммавий митинглар бўлиб ўтди, деб хабар бермоқда Daily NК. Маълумотларга кўра, пойтахтдаги намойишларда 120 минг киши қатнашган.
Reuters томонидан эълон қилинган фотосуратларда одамлар стадионда қўлларида: “Бутун АҚШ материки бизнинг ўқ отиш диапазонимизда” ва “АҚШ — дунёни вайрон қилувчи” деган ёзувларни ушлаб турганини кўриш мумкин.
Daily NК газетасининг ёзишича, норозилик намойишида Шимолий Корея Меҳнат партияси марказий қўмитаси котиби, мамлакат бош вазири ўринбосари, шунингдек, меҳнат ташкилотлари, фабрикалар вакиллари ва талабалар иштирок этган.
“Америка империализми билан ҳисоб-китоб қилишни кечиктирмаслик бизнинг авлодимизнинг бурчидир”, дея намойишчилар баёнотидан иқтибос келтирди Daily NК.
1950 йил 25 июнь куни Шимолий ва Жанубий Корея ўртасида бошланган Корея уруши 1953 йилнинг 27 июлида сулҳ битимининг имзоланиши билан якунланди. Шимолий коалиция таркибига Шимолий Корея, Хитой ва СССР кирган. АҚШ, Буюк Британия ва бошқа бир қатор давлатлар БМТ тинчликпарвар кучлари таркибида Жанубий Корея томонида ҳаракат қилишди.
Ҳозирда АҚШ ва Шимолий Корея расмий равишда уруш ҳолатида, чунки можаро сулҳ имзоланиши билан якунланган. Уруш расман якунлангани ҳақида эълон қилинмаган.
Изоҳ (0)