Техас полицияси Uber такси ҳайдовчисини отиб ўлдирган америкалик Фиби Копасни ҳибсга олди. Аёл такси ҳайдовчиси уни ўғирлаб, Мексикага олиб кетмоқчи деб ўйлаган. Бу ҳақида CBC News хабар берди.
“Таксида кетаётган пайтда Копас уни Мексикага олиб кетишяпти, деб ўйлаб, ҳайдовчи Педрани отиб ташлади. Тергов давомида ҳайдовчи аёлни ўғирлашга урингани ёки аёл борадиган манзилни ўзгартиргани аниқланмади”, — дейилади полиция департаменти баёнотида.
Дастлабки маълумотларга кўра, ҳайдовчи аёлни АҚШ давлат чегараси яқинидаги аҳоли пункти орқали олиб кетаётганда аёл Мексиканинг Хуарес шаҳрига олиб борадиган йўл кўрсаткичига кўзи тушган ва ҳайдовчига ўқ узган.
Оғир тан жароҳати олган ҳайдовчи бир неча кундан кейин касалхонада вафот этди. Аёл қотилликда айбланиб, ҳозирда ҳибсда сақланмоқда.
Изоҳ (0)