Япония ҳукумати бош котиби Хироказу Матсунонинг таъкидлашича, Россияда 3 сентябрни милитаристик Япония устидан ғалаба ва Иккинчи жаҳон уруши тугаган кун сифатида белгилаш тўғрисидаги қонун Россияда японларга қарши, Японияда русларга қарши кайфиятни қўзғатиши мумкин.
“Шундай қонун қабул қилинганини биламиз, ўтган урушга тўхталадиган бўлсак, мамлакатимиз доимий равишда Россиянинг қарашлари ва позициясини эътиборга олиб келади. Қабул қилинган қонун нафақат рус халқи орасида японларга қарши кайфиятни кучайтиради, балки япон халқи орасида Россияга қарши кайфиятнинг кучайишига ҳам олиб келади. Бу жуда ачинарли. 23 июнь куни дипломатик каналлар орқали Россия томонига Япониянинг ушбу позицияси ҳақида тушунча берилди, шунингдек, Россия халқларимиз ўртасида кераксиз қарама-қаршилик яратмасликка чақирилди”, — деди Матсуно Токиодаги матбуот анжуманида.
24 июнь куни Россия президенти Владимир Путин 3 сентябрни милитаристик Япония устидан ғалаба ва Иккинчи жаҳон уруши тугаган кун сифатида белгилаш тўғрисидаги қонунни имзолади, тегишли ҳужжат ҳуқуқий ахборотнинг расмий интернет порталида эълон қилинди.
Қонун “3 сентябрь — Иккинчи жаҳон уруши тугаган кун (1945)” номини “3 сентябрь — милитаристик Япония устидан ғалаба ва Иккинчи жаҳон уруши тугаган кун (1945)”га ўзгартиради. Тушунтириш материалларида қайд этилишича, “махсус операция” бошланганидан сўнг Токио “коллектив Ғарб билан келишилган ҳолда Россия Федерациясига қарши замонавий рус-япон муносабатларида мисли кўрилмаган нодўстона кампанияни бошлади”. Қонундаги ўзгартириш “қарши чоралар”дан бири бўлиши мумкинлиги таъкидланган.
Матсуно Россияни ушбу қонунни қабул қилишга ундаган сабабларга тўхталмаслигини таъкидлади, аммо Япония Россияга қарши қаттиқ санкциялар ва Украинага кучли ёрдамни давом эттиришига ишонтирди.
Изоҳ (0)