Афғонистоннинг Ўзбекистон билан чегарадош Балх вилояти Мозори Шариф шаҳридаги мол бозорига Қурбон ҳайити арафасида миллиондан ортиқ жониворлар олиб чиқилган, дейди “Дарё”нинг Афғонистондаги мухбири.
Мозори Шариф аҳолиси бу йил Қурбон ҳайити олдидан сигир, қўй ва туялар нархи ўтган йилларга нисбатан қимматлашганини айтмоқда. Афғонистондаги ишсизлик ва қашшоқлик туфайли одамларнинг қурбонлик учун жонлиқ сотиб олишга қурби етмаяпти. Чорва сотувчилари ҳам савдо аввалги йиллардагидек эмаслигини таъкидлади.
Савдогарларнинг “Дарё” мухбирига маълум қилишича, нарх-наво ошишига ҳайвонларнинг мамлакат ташқарисига ноқонуний олиб чиқилиши ва ем-хашакнинг қимматлиги сабаб бўлган.
Мозори Шариф бозорига қўшни Шибирғон, Сарипул каби вилоятлар аҳолиси ўз чорваларини олиб келади. Бозордан қўй ва сигир олган бир неча киши бу йил қўйлар нархи 30 фоизга ошганини айтмоқда. Бу эса одамларнинг қурбонлик сотиб олишини янада қийинлаштирган.
“Дарё” мухбирининг айтишича, мол бозорида эчки ва қўйларнинг нархи 100 доллардан бошланиб 350 долларгача, сигирларнинг нархи 250 доллардан бошланиб 1 500 долларгача турибди.
Қурбон ҳайити бошқа мусулмон мамлакатлари каби Афғонистонда ҳам алоҳида ўрин тутади. Ҳар йили байрами арафасида мол бозорларида олди-сотди авжига чиқади.
Афғонистонда ҳайит одатда уч кун нишонланади. Афғон халқи ҳайит кунларида миллий либослар тикиб, кияди. Қариндошлари ва қўшниларини зиёрат қилади.
“Дарё” мухбири билан гаплашган бир неча киши Қурбон ҳайитига тайёргарлик кўраётгани, қурбонлик учун жонлиқ, мевалар олгани, янги кийим-кечак тиктираётганини айтди.
Изоҳ (0)