“Толибон” ҳаракати аёлларни анъанавий зулмдан озод қилди ва уларга “озод одамлар” мақомини қайтарди. Бу ҳақда “Толибон” олий етакчиси Ҳайбатуллоҳ Охундзода Қурбон ҳайити муносабати билан берган баёнотида айтиб ўтди.
“Хотин-қизларни кўплаб анъанавий зулмлардан, жумладан, мажбурий никоҳдан қутқариш бўйича аниқ чора-тадбирлар кўрилди, уларнинг шаръий ҳуқуқлари ҳимоя қилинди. Аёлларнинг озод ва ҳурматга лойиқ инсон сифатидаги мақоми тикланди. Барча институтлар аёлларга никоҳ, мерос ва бошқа ҳуқуқларни таъминлашда кўмаклашиши шарт этиб қўйилди”, — дейилади Охундзоданинг баёнотида.
Унинг сўзларига кўра, “Толибон” аёлларнинг ислом шариати асосида фаровон ҳаёт кечириши учун зарур шароитни яхшилаш бўйича зарур чораларни кўрган.
Эслатиб ўтамиз, 2021 йил августида Афғонистонда ҳокимиятни қўлга киритгач, “Толибон” улар исломий қадриятларга мос келади, деб ҳисоблаган чекловларни жорий қилганди. Хусусан, ҳаракат аёл телебошловчиларни ҳижоб ўрашга мажбурлади, аёл актрисалар иштирокидаги драматик фильмлар ва кўрсатувлар намойишини тақиқлади.
“Толибон” ўрта ва юқори мактаб ўқувчи қизларининг мактабга боришини, қизларнинг университетларда ўқишини тақиқлади, профессор-ўқитувчилар жамоаси вакилларига университетлар эшикларини ёпди, аёлларни барча миллий ва халқаро ноҳукумат ташкилотларида ишлашдан четлаштиришни буюрди. Бу қарорлар кўплаб хорижий давлатлар ва халқаро ташкилотлар, жумладан, Бирлашган Миллатлар Ташкилоти томонидан танқидларга сабаб бўлди.
Изоҳ (0)