“Титан” сувости кемаси экипажининг аъзолари ҳалок бўлган, деб топилди

Атлантика океанидаги қутқарув операцияси иштирокчиларининг фикрича, йўқолган “Титан” сувости кемаси қидирилаётган ҳудуддан топилган қолдиқлар унга тегишли. Бу ҳақда CNN қутқарув баёнотига асосланиб хабар берди.

Телеканал маълумотларига кўра, топилмалар “Титан” корпусининг парчаларидир. Шу билан бирга, CNN иқтибос келтирган ҳужжатда экипаж ва капсулани қидириш давом этаётгани қайд этилган.

Сувости кемасига эгалик қилувчи OceanGate компанияси экипаж аъзоларининг барчаси ҳалок бўлган, деб ҳисобламоқда. Компания ҳамдардлик баёнотини чоп этди.

АҚШ Қирғоқ хавфсизлик хизмати “Титан” бортидаги беш киши ҳалок бўлганини тасдиқлади. Хизмат вакили экипаж аъзоларининг оилаларига ҳамдардлик билдирди. Қутқарувчилар океан тубидаги “Титаник” кемасининг бурнидан тахминан 500 метр масофада бешта йирик аппарат бўлагини топди. Қолдиқлар экипажнинг “ҳалокатидан” далолат беради.

Қирғоқ қўриқлаш хизмати маълумотларига кўра, “Титан”да портлаш содир бўлган — ичкарига йўналтирилган портлаш. Бу нима учун, қандай ва қачон содир бўлгани ҳозирча номаълум. Океан тубидаги оғир вазиятга қарамай, экипаж аъзоларининг жасадларини қидириш давом этади.

• 19 июнь куни Атлантика океанида сайёҳларни “Титаник” чўккан жойга олиб тушаётган хусусий сувости кемаси ғойиб бўлди. Кема бортида беш киши, жумладан, британиялик миллиардер Хемиш Хардинг ва OceanGate асосчиси Стоктон Раш бор эди.
• Сувости кемасини қидиришда АҚШ ва Канаданинг Қирғоқ қўриқлаш хизматлари, шунингдек, хусусий кемалар иштирок этди. “Титан”даги кислород таъминоти 96 соатликга мўлжалланган эди. АҚШ Қирғоқ қўриқлаш хизматининг хабар беришича, “Титан”даги кислород 22 июнь куни АҚШнинг Шарқий қирғоғи вақти билан соат 07:10 (Тошкент вақти билан 16:10) да тугаши керак эди.