Қашқадарё вилоятининг Қарши туманида хавфсизлиги таъминланмаган трансформатор сабаб 7 ёшли бола икки қўлидан ажралиб қолди. Бу ҳақда “Дарё”га унинг отаси Шерзод Ўроқов хабар берди.
Маълум бўлишича, воқеа 2023 йилнинг 22 февраль куни содир бўлган.
.jpg)
“Ўғлим ўша куни трансформаторнинг очиқ жойидан ичкарига асаларининг уясини кўриб, асал олиш мақсадида кирган. Ва чиқиб кетаётган пайтда қўли токка тегиб кетган. Оқибатда ток уриб, ўғлим пастга чуқурга тушиб кетган. Яхши одамлар ўғлимни чуқурнинг ичидан тортиб олишганини айтди”, — дейди боланинг отаси Шерзод Ўроқов.
Мурожаатчи отанинг айтишича, шу воқеадан сўнг ўғли 10 кун шифохонада даволангач, ўзига келган.
“Аллоҳга шукурки, ўғлим омон қолган. Лекин бугунги кунга келиб, ўғлимнинг икки қўли тирсагигача кесиб ташланган. Ҳеч қандай иш қилолмайди. Ўзимиз овқатлантирамиз, ўзимиз кийинтирамиз. Ҳатто ҳожатхонага ҳам ўзимиз олиб бориб, ўзимиз олиб қайтамиз. Масъулларга мурожаат қилиб, протез қўл қўйилишида ёрдам сўрасам, омон қолганига шукр қилинг дейишади. Нима учун хавфсизлиги таъминланмаган трансформатор учун менинг ўғлим юз фоиз айбдор бўлиши керак”, — дейди ота.
Шерзод Ўроқов 3 миллион сўм маош эвазига қишлоқ хўжалиги билан шуғулланувчи корхонада тракторчи бўлиб ишлашини, ўғлининг келажаги учун протез қўл қўйдиришга қурби етмаётганини айтмоқда.
“Мен барча ташкилотларга мурожаат қилиб, ўғлимнинг келажаги учун ёрдам беришларини сўрадим. Ўғлим эртага ишлаши учун, ҳеч бўлмаса ўзининг юмушларини бажариши учун унга протез қўл қўйиб берилиши керак. Нархлари билан қизиқдим, шахсан мен учун жуда қиммат. Трансформаторни шу ҳолатга ташлаб қўйиб, ўғлимнинг мудҳиш воқеага дучор бўлишига сабабчи бўлганлар жавобгарликка ҳам тортилиши лозим”, — дейди Шерзод Ўроқов.
Хавфсизлиги таъминланмаган трансформатор сабаб қўлларидан айрилган Алишер Қўшшаев айни пайтда 8 ёшда.
Боланинг отасига кўра, такшилотларга қилинган мурожаатлардан натижа йўқ. Барча боланинг ўзини айблаш билан овора. Аммо унга ёрдам бериш масаласи ҳеч кимнинг хаёлига ҳам келмаяпти.
Изоҳ (1)
Xuddi shunaqa holat Navoiy viloyati Uchquduq tumanida ham sodir bo'ldi shu yilning mart oyida buni ham yoritishingizni so'raymiz.Nurislombek ni ham qo'llarini kesishdi.Mana bu link Youtubeda bloger qilgan Nurislom haqida
https://www.youtube.com/watch?v=O2Yug829Do0&t=130s