Ўзбекистон либерал-демократик партиясидан Ўзбекистон Республикаси Президентлигига номзод Шавкат Мирзиёев қашқадарёлик сайловчилар билан учрашув чоғида келгуси етти йилда таълимни ривожлантиришга оид режалар ҳақида тўхталди.
“Энг аввало, 2030 йилга қадар вилоятда мактабгача таълим соҳасидаги қамров юз фоизга етказилади. Шу мақсадда, қарийб 1 триллион 300 миллиард сўм маблағ ҳисобидан, 1 минг 745 та янги боғча ташкил этилади. Олис ва чекка ҳудудларни мактабгача таълим билан қамраб олиш учун 1 500 ўринли 28 та мобил гуруҳ ташкил этилади”, — деди номзод.
Шунингдек, боғчаларда 12 ўринли 350 та бир йиллик бепул тайёрлов гуруҳлари ва 50 та қисқа муддатли гуруҳлар тузилади.
“Келгуси етти йилда мактаб таълимида қўшимча 130 минг ўқувчи ўрни яратилади, вилоятда ўқувчиси 30 нафардан ортиқ бўлган синфлар қолмайди. Шунингдек, 237 та мактаб мукаммал таъмирланади, 591 та мактаб замонавий ўқув анжомлари, лаборатория ва компьютерлар билан жиҳозланади”, – деди номзод.
Шавкат Мирзиёев тиббиёт соҳасидаги режаларни ҳам маълум қилди.
Хусусан, тиббиёт соҳасида 37 та поликлиника, 95 та оилавий шифокорлик пункти ташкил этилади, даволаш ўринлари 12 мингтага етказилади.
“Қарши шаҳридаги тарқоқ 5 та шифохона негизида “Она ва бола” кластери барпо этилади. Нишон, Чироқчи, Косон, Қарши ва Шаҳрисабз шаҳарларида замонавий туғруқ комплекслари қурилади.
Келгуси йилларда 800 нафар эҳтиёжманд аёллар ва уларнинг вояга етмаган фарзандларини даволаш харажатлари давлат томонидан қоплаб берилади”, – деди номзод.
Изоҳ (0)