Бирлашган Миллатлар Ташкилоти бош котиби Антониу Гутерриш 2022 йилда Украинада 136 нафар боланинг ўлими учун Россия жавобгар эканини маълум қилди. Бу ҳақда ташкилотнинг йиллик ҳисоботида келтирилган.
Ҳужжат БМТ Хавфсизлик Кенгаши аъзоларига юборилган, деб хабар берди ҳисобот билан танишиб чиққан Reuters ва Agence France-Presse нашрлари. AFP хабарига кўра, можаро зоналаридаги болалар ҳақида БМТ ҳисоботи келаси ҳафта эълон қилинади. Reuters Гутерриш Россия армиясини “шармандалар рўйхати” деб аталувчи глобал қонунбузарлар рўйхатига киритганини ёзди.
БМТ бош котиби ўз ҳисоботида ўлган ва майиб бўлган болалар сонининг кўплиги, шунингдек, Россия кучларининг мактаб ва касалхоналарга ҳужумлардан “айниқса ҳайратда” эканини айтди. Ҳисоботда айтилишича, Гутерриш украиналик ҳарбийлар томонидан ҳам болаларга нисбатан кўплаб шунга ўхшаш қоидабузарликлардан “қаттиқ хавотирда”.
Ташкилот 2022 йилда Украинада 477 нафар бола ўлдирилганини тасдиқлади. БМТ шулардан 136 нафарининг ўлимига Россия Қуролли кучлари жавобгар эканини исботлашга муваффақ бўлди, яна 80 нафар бола Украина армиясининг ҳаракатлари оқибатида ҳалок бўлган.
Хабарда айтилишича, уруш давомида 909 нафар бола турли жароҳатлар олган, улардан 518 нафари Россия армияси ва унга алоқадор гуруҳларнинг ҳаракатларидан жабрланган, 175 нафар бола Украина Қуролли кучлари фаолияти туфайли яраланган.
Ҳисоботда айтилишича, Россия аскарлари Украинадаги мактаб ва шифохоналарга 480 та ҳужум уюштирган. Ҳужжатга кўра, 91 нафар бола россиялик ҳарбийлар томонидан тирик қалқон сифатида фойдаланилган.
- Март ойида Гаагадаги Халқаро жиноят суди Россия президенти Владимир Путинни ҳибсга олишга ордер берган эди. У Украинанинг босиб олинган ҳудудларидан болаларни Россияга ноқонуний депортация қилишда гумон қилинмоқда. Худди шундай ордер Россия болалар омбудсмани Мария Львова-Беловага нисбатан ҳам чиқарилган.
Изоҳ (0)