Birlashgan Millatlar Tashkiloti bosh kotibi Antoniu Guterrish 2022-yilda Ukrainada 136 nafar bolaning o‘limi uchun Rossiya javobgar ekanini ma’lum qildi. Bu haqda tashkilotning yillik hisobotida keltirilgan.
Hujjat BMT Xavfsizlik Kengashi aʼzolariga yuborilgan, deb xabar berdi hisobot bilan tanishib chiqqan Reuters va Agence France-Presse nashrlari. AFP xabariga ko‘ra, mojaro zonalaridagi bolalar haqida BMT hisoboti kelasi hafta e’lon qilinadi. Reuters Guterrish Rossiya armiyasini “sharmandalar ro‘yxati” deb ataluvchi global qonunbuzarlar ro‘yxatiga kiritganini yozdi.
BMT bosh kotibi o‘z hisobotida o‘lgan va mayib bo‘lgan bolalar sonining ko‘pligi, shuningdek, Rossiya kuchlarining maktab va kasalxonalarga hujumlardan “ayniqsa hayratda” ekanini aytdi. Hisobotda aytilishicha, Guterrish ukrainalik harbiylar tomonidan ham bolalarga nisbatan ko‘plab shunga o‘xshash qoidabuzarliklardan “qattiq xavotirda”.
Tashkilot 2022-yilda Ukrainada 477 nafar bola o‘ldirilganini tasdiqladi. BMT shulardan 136 nafarining o‘limiga Rossiya Qurolli kuchlari javobgar ekanini isbotlashga muvaffaq bo‘ldi, yana 80 nafar bola Ukraina armiyasining harakatlari oqibatida halok bo‘lgan.
Xabarda aytilishicha, urush davomida 909 nafar bola turli jarohatlar olgan, ulardan 518 nafari Rossiya armiyasi va unga aloqador guruhlarning harakatlaridan jabrlangan, 175 nafar bola Ukraina Qurolli kuchlari faoliyati tufayli yaralangan.
Hisobotda aytilishicha, Rossiya askarlari Ukrainadagi maktab va shifoxonalarga 480 ta hujum uyushtirgan. Hujjatga ko‘ra, 91 nafar bola rossiyalik harbiylar tomonidan tirik qalqon sifatida foydalanilgan.
- Mart oyida Gaagadagi Xalqaro jinoyat sudi Rossiya prezidenti Vladimir Putinni hibsga olishga order bergan edi. U Ukrainaning bosib olingan hududlaridan bolalarni Rossiyaga noqonuniy deportatsiya qilishda gumon qilinmoqda. Xuddi shunday order Rossiya bolalar ombudsmani Mariya Lvova-Belovaga nisbatan ham chiqarilgan.
Izoh (0)