Ўзбекистонда умумий сув ресурсларидан тежамли фойдаланиш масаласида бир қатор муаммолар мавжуд. Бу ҳақда Сенат раиси Танзила Норбоева бугун (22 июнь) бўлиб ўтаётган парламент юқори палатаси ялпи мажлисида маълум қилди.
Танзила Норбоеванинг таъкидлашича, Ўзбекистонда сувдан рационал фойдаланишга қаратилган чоралар етарли эмас.
“Сув ресурсларининг камайиши ва танқислиги бутун дунёда кузатилаётган глобал муаммо. Бундан тегишли хулосалар қилиб, сувни тежаш ва рационал ишлатишни ўрганишимиз зарур. Лекин бу йўналишда ўз ечимини кутаётган асосий масала–сувдан фойдаланишдаги исрофгарчилик ва ўйловсиз ишлатилиши масаласи. Кундалик ҳаётимизда сувни беҳуда, мақсадсиз исроф қилиш ҳолатларига кўп дуч келмоқдамиз. Охирги пайтларда сув билан боғлиқ тизимли муаммолар ҳақида жамоатчилик бонг урмоқда. Турли танқидий-таҳлилий чиқишлар, асосли мулоҳазалар билдирилмоқда. Бироқ масъуллар жим. Сувдан рационал фойдаланишга қаратилган кенг қамровли чора-тадбирларни кўрмаяпмиз” — деди Сенат раиси.
Маълум қилинишича, дунёнинг кўплаб тараққий этган давлатларида турмуш даражаси қанчалик юқори бўлмасин, сувни асраб-авайлашга ниҳоятда жиддий эътибор қаратилади. Ўзбекистонда эса оддий кундалик рўзғор даражасидан тортиб, йирик давлат ташкилотларигача сувдан оқилона фойдаланиш маданияти ҳали тўлиқ шаклланмаган. Айниқса, катта шаҳарларда сувни исроф қилиш, тежамаслик ҳолатлари кўпроқ кўзга ташланади.
“Бундай ҳолатларга чек қўйиш мақсадида ишни энг қуйидан, яъни оилалар ва маҳаллалардан бошлаш зарур. Бу борада мутасадди тузилмалар, фуқаролар йиғинлари масъуллари масъулиятни жиддий оширишлари, одамларга тушунтиришлари зарур. Сувни исроф қилиш ҳолатларига нисбатан жамоатчиликнинг фаол таъсир усулларидан ҳам самарали фойдаланиш, яъни муросасиз жамоатчилик назоратини ҳам таъминлаш зарур. Республика ва маҳаллий даражадаги барча раҳбарларнинг сув ресурсларини асраш бўйича масъулияти ва шахсий жавобгарлигини ошириш чораларини кўриш лозим”, — дея таъкидлади Танзила Норбоева.
Изоҳ (0)