“Кавказ асираси” фильмидаги Нина роли Наталья Варлейга оламшумул машҳурлик келтирди. Ўзининг жозибали кўринишидан ташқари, актриса кўплаб истеъдодларга эга: у шоира, қўшиқчи ва телебошловчи сифатида ҳам танилди. Наталья Варлей бугунги кунда ҳам фильмларда рол ўйнайди, аввалгидек гўзаллиги билан кўпчиликни мафтун эта олади.
Ақлли, цирк артисти ва шунчаки соҳибжамол
Бўлажак актриса Наталья Варлейнинг томирларида француз, рус ва валлей миллатининг аралаш қони оқади. Онасининг асл келиб чиқиши француз. Отаси ҳам зодагонлар оиласидан бўлган. Актрисанинг табиий гўзаллиги бир нечта миллат қонининг аралашувидандир, эҳтимол.
Бўлажак актриса Руминияда денгиз капитани оиласида туғилган. Қизи туғилгандан сўнг, улар Мурманскка кўчиб ўтишади, Наташа шу ердаги мактабга боради. Унинг синглиси Ира ҳам шу ерда туғилган.
Наташа ёшлигидан кўплаб ижодий қобилиятларни намоён этади: у равон ўқийди, тўрт ёшидан шеърлар ёза бошлайди, яхши куйлайди ва ажойиб расмлар чизди. Шунинг учун ота-онаси уни мусиқа мактабига беради.
50 йилларнинг охирларида оила яшаш жойини ўзгартириб, Москвага кўчиб ўтади. Бир куни онаси қизларини циркка олиб боради. Эквилибрист (беқарор тана ҳолатида сим, арқон, қўл, бош, велосипед, стул ва ҳоказода мувозанатини сақлаш қобилиятига эга артист)лар Наталья да унутилмас таассурот қолдиради. Шу пайтдан бошлаб қиз цирк артисти бўлишни орзу қила бошлайди. Бироқ соғлиғи сабабли унга жисмоний фаолият тақиқланганди. Шу сабабли ота-онаси қизининг цирк артисти бўлишига қатъиян қарши бўлади.
Аммо кучли характерга эга Наталья Варлей таслим бўлмайди. У ота-онасидан яширинча акробатика студиясида машғулотларга ёзилади. Ўрта мактабни тугатгач, эквилибрист бўлишга қарор қилади. Унинг ҳаракатлари бесамар кетмайди. Имтиҳонларни топшириб, цирк мактабига қабул қилинади. Наталья мактабни аъло баҳоларга битиради.
Ёрқин кинокарьера
Варлейга Рангли булвардаги циркда таниқли рассом Л.Янгибаров билан бирга ишлаш бахти насиб этади. Унинг саъй-ҳаракатлари туфайли қиз учун кинога йўл очилади. Цирк спектаклларидан бирида артистнинг дўсти — “Одесса” киностудияси директори Юнгвалд-Хилкевич истеъдодли, чиройли ва ҳаракатчан Наташага эътибори тушади ва уни “Камалак формуласи” фильмига таклиф қилади.
Тез орада Наталья Варлей бутун мамлакатга танилади. “Кавказ асираси ёки Шурикнинг янги саргузаштлари” номли совет комедияси экранларга чиқади. Нина роли учун Леонид Гайдай кўплаб истеъдодли ва чиройли актрисаларни синаб кўради. Бироқ у Варлейни танлайди. У режиссёрни ёшлиги ва ақл бовар қилмайдиган жозибаси билан мафтун этади.
Жасур Наташа фильмдаги барча трюкларни каскадёрлар иштирокисиз ўзи ижро этган. “Вий” фильмида эса актриса суратга олиш пайтида бахтсиз ҳодисага учрашига сал қолади. Уни суратга олиш майдончасидаги ҳамкасби Леонид Куравлёв вақтида қутқариб қолади.
Наталья Варлей фильмларда рол ўйнашни давом эттиради, К. Станиславский номидаги Москва драма театрининг спектаклларида ҳам қатнашади. Лекин ҳеч қайси рол унга “Кавказ асираси”даги каби оламшумул машҳурлик келтирмайди. Бундан ташқари, актриса турли жанрлар — эртаклар, комедиялар, мусиқий фильмлар ва ҳатто фантастик жанговар фильмларда ҳам рол ўйнаган.
Шоира, ёзувчи, хонанда
Варлейнинг актрисаликдан ташқари, бошқа қобилиятлари ҳам бор эди. У болалигидан шеър ёзарди. Шу сабабли актриса адабиёт университетига ҳужжат топширади, 2 та шеърий тўпламини ва мусиқий асарлари пластинкасини чиқаради. Турли телекўрсатувларда Наталья ўзи ёзган шеърларидан ўқиб беради, ёқимли овози билан томошабинларни ҳайратда қолдиради.
Наталья шу билан тўхтаб қолмайди. У “Арқонда юрувчи” (“Канатоходка”) китобини ёзади. Китобда у саҳна орти сирларини тасвирлайди, гувоҳи ва иштирокчиси бўлган кўплаб фильмларнинг суратга олиш жараёнлари ҳақида гапириб беради.
Наталья Варлейнинг омадсиз тугаган учта никоҳи
Ёшлигида Наталья Варлей актёр Николай Бурляевга турмушга чиқади. Қизнинг дўстлари ва танишлари бу танловдан ҳайратда қолишади. Ахир жуда кўп йигитлар қизга ошиғ-у беқарор эди. Аммо Варлей ҳеч кимга қулоқ солмайди — у севиб қолганди. Яқинларининг гап-сўзларига эътибор бермай, Николайга турмушга чиқади.
Аммо дўстлари ҳақ эди — ёшларнинг оилавий ҳаёти ҳавас қиларли эмасди. Николай рафиқасига қараганда чиройли ва жозибали актрисалар билан рол ўйнагани Наталья нинг рашкини келтирарди. У асабийлашар, эри билан жанжаллашар ва ота-онасиникига кетиб қоларди. Бир марта навбатдаги жанжалдан кейин Варлей уйига қайтиб келади ва эрини актриса Печерникова билан ошхонада Наташа тайёрлаган шўрвани ичаётганининг устидан чиқиб қолади. Бу унинг сабр косасини тўлдиради ва Варлей эрини бутун умрга тарк этади.
Иккинчи марта Наталья ҳамкасби Владимир Тихоновга турмушга чиқади. Бироқ бу никоҳ ҳам узоқ давом этмайди. Владимир гиёҳванд моддаларга қарам бўлиб қолади. У эрига гиёҳвандликка қарши курашда ёрдам беришга ҳаракат қилади, аммо барча уринишлари бесамар кетади. Шундан сўнг актриса ажрашиш учун ариза беради.
Мафтункор Наталья Варлейнинг учинчи турмуш ўртоғи ҳеч ким танимайдиган Владимир эди. Havas қиларли даражада ўтган тўй ҳам уларнинг никоҳини сақлаб қололмайди. Наталья бу никоҳида ҳақиқий муҳаббатни ҳис қилмайди. Владимир актриса билан муносабатларни расмийлаштиргандан сўнг, ўз мақсадига эришиб, унга бўлган қизиқишини бутунлай йўқотади.
Ёлғизлик ва севимли уй ҳайвонлари
Ақлли ва ҳалигача чиройли Наталья Варлей шаҳар чеккасида жойлашган шинам уйда яшайди. У ҳар куни эрталаб ям-яшил майсазорга чиқишни, гуллар ҳидидан, қушлар сайрашидан завқланишни ва қайин дарахтлари остидаги скамейкада ўтиришни яхши кўради.
Варлей учта муваффақиятсиз никоҳдан кейин шахсий ҳаётини тартибга солишга ҳаракат ҳам қилмади. У деярли барча вақтини севимли уй ҳайвонларига ғамхўрлик қилишга бағишлайди. Актрисанинг сўзларига кўра, мушуклари нафақат асаб тизимини тинчлантиради, балки циркдаги иши оқибатида бўғимларидаги оғриқларни ҳам қолдиради.
Изоҳ (0)