“Умида Мирҳамидова ёшига яраша иш қилса бўлмайдими?” — хонанда ҚВЗдаги иштироки, ўринли эътирозлар ва у қўяётган чекловлар ҳақида гапирди (видео)

“Дарё”нинг YouTube’даги каналида хонанда Умида Мирҳамидова нега ҚВЗда иштирок этаётгани ва чиқишлари кескин танқидларга учрагани ҳақидаги саволларга қуйидагича жавоб берди.

“ҚВЗ оиласига қўшилишимнинг сабаби жуда оддий бўлган. Ташкилотчилар ярим финал босқичига меҳмон сифатида чақиришган. Мен шунчаки чиқишларни томоша қилиб ўтиришим керак эди. Аммо ҚВЗ жамоаларининг чиқишлари кутилмаган импровизацияларга бой бўлади. Аграр университетининг жамоаси йигитлари импровизация шартини бажараётганда, томошабинлар орасидан мени танлашди. “Нима қиламан?” десам, “Ҳеч нима, шунчаки иштирок этиб берсангиз бўлди”, дейишди. Хуллас, импровизация шартида тўй саҳнаси кўрсатилди ва жамоа ғолибликни қўлга киритди. Ундан кейин “Сиз учун сценарий ёзилган”, деб яна таклиф этишди. Ҳеч қачон ҚВЗда иштирок этаман деб ўйламаган эдим, — дейди хонанда.

Умида Мирҳамидова ижтимоий тармоқларда муҳокамаларга сабаб бўлган чиқишларидан уялгани ҳақида ҳам айтиб ўтди.

“ҚВЗдаги чиқишлар кўпинча тренддаги гап-сўзларга қурилади. Аввалига саҳна кўринишлари ижтимоий тармоқларда оммалашиб кетади, деб ўйламагандим. Бу саҳна кўринишлари ёшимга тўғри келмас экан, деб уялган пайтларим ҳам бўлди. Аммо ёшларга ёрдамим тегаётганидан хурсандман. Чунки буларни ҳам қўллаб-қувватлаш керак. Аммо ҳамиша саҳна кўринишларида эҳтиёткор бўлишга ҳаракат қиламан. Бир оғиз гап билан ҳам “Умида Мирҳамидова ёшига яраша иш қилса бўлмайдими?” деган эътирозларга сабаб бўлишни истамайман. Танлов экан, ҳаммасига чидаб бериш керак, шунда ғолиб бўламиз демайман. Агар ёқмайдиган мавзудаги томоша бўлса дарҳол рад этаман. Нафсониятимга тегадиган гап-сўзларни айтишларига йўл қўйман, — дейди Умида Мирҳамидова.

ҚВЗ жамоаларининг чиқишлари кўплаб муҳокамаларга сабаб бўлади. Хўш, Умида Мирҳамидова устоз санъаткор сифатида ёшларга тўғри йўл кўрсата оладими ёки жамоадош сифатида уларнинг камчиликларидан кўз юмадими?

“Ёшлар барибир қизиққон бўлади. Биз ҳам худди шу даврдан ўтганмиз. Албатта, йўл-йўриқ кўрсатишга ҳаракат қиламан. Аммо ҳар нарсага танқид қилавериб уларни ҳам бездириб қўймаслик керак. Ишонаман, вақт ўтган сари ўзларига баъзи ҳаракатлари эриш туюлиб қолади”, — дейди хонанда.

Видеони тўлиқ ҳолда томоша қилинг: