Севгилисининг хиёнатини билгач, “Муҳташам юз йил” сериалидаги Хуррам ролини ташлаб кетган Марям Узерлининг тақдири қандай кечди?

12 август куни Марям Узерли 40 ёшга тўлади. “Муҳташам юз йил”даги ажойиб роли туфайли бир вақтлар ҳеч ким билмаган германиялик қиз тўсатдан бутун дунё таниган актрисага айланди.

Марямнинг актрисалик салоҳияти мактаб йилларидаёқ шакллана бошлаганди — у кўплаб спектаклларнинг доимий иштирокчиси эди. Кейинчалик 17 ёшида у ижодий ривожланишини давом эттириб, Гамбургдаги актёрлик мактабида таҳсил олади.

Вақт ўтиши билан қиз немис спектакллари ва телесериалларида кичик ролларда дебют қилишни бошлайди. 2010 йилда кутилмаган воқеа содир бўлади — 4 кун ичида унинг ҳаёти таниб бўлмас даражада ўзгарди.

“Муҳташам юз йил” сериалининг сценарий муаллифи ва продюсери узоқ вақт давомида Роксолана роли учун идеал актриса топа олмайди — қидирув саккиз ой давом этади. Бироқ бу синчковлик, албатта, ўз самарасини беради. Марям дарҳол кастингга рози бўлади, тезда Туркияга учиб келиб, жамоанинг бир қисмига айланади.

Актриса турк тилини жуда ёмон билгани туфайли иш бир оз мураккаблашади. Интервьюларининг бирида ўзи тан олганидек, у суратга олиш жараёнида қаҳрамони билан бирга турк тилини ўрганган. Бироқ бу Узерлининг ролини аъло даражада ижро этишига тўсқинлик қилмайди, кейинчалик у 23 та мукофотга сазовор бўлади. Туркиянинг GQ журнали уни “Йил аёли” сифатида эътироф этади ва Туркиянинг энг машҳур актрисаларидан бирига айланади.

Бироқ мухлислар 2013 йилда севимли актрисаси сериални тарк этиб, зудлик билан Германияга учиб кетгани ҳақидаги хабардан ҳайратда қолади. Марямнинг бундай қарорга келиши сериал ижодкорлари учун ҳам кутилмаган ҳол эди.

Актриса учун сабр косасини тўлдирган сўнгги томчи нима бўлгани ҳозиргача маълум эмас. Расмий сабаб — сурункали чарчоқ. Шу билан бирга, пул муаммоси ва продюсерларнинг гонорарни оширишдан бош тортгани ҳам айтилган. Кейинчалик маълум бўладики, айнан шу даврда актрисанинг шахсий ҳаётида қийинчиликлар юзага келган. У севгилиси — туркиялик тадбиркор Жан Атешнинг унга хиёнат қилганини билиб қолади. Бу пайтда актриса ҳомиладор эди.

Аммо 2014 йил февраль ойида қизи Лара туғилгандан сўнг, Узерли тезда оёққа туради ва карьерасини ривожлантиришда давом этади. Ўша йилнинг охирида у йирик турк продюсерлик компанияси билан шартнома имзолайди ва бошқа кўплаб лойиҳаларда, жумладан, 2019 йилда Netflix томонидан суратга олинган “Ари уяси” фильмида рол ўйнайди.

Мазкур фильмда иштирок этиш актриса учун осон бўлмайди, суратга олишдан олдин асаларилардан қўрқмаслик учун бир неча ой давомида машғулотларда қатнашиши керак эди. Бундан ташқари, иш пайтида арилар жамоага кўп марта ҳужум қилган. Аммо охир-оқибат, саъй-ҳаракатлар ўзини оқлайди — фильм 5 та мукофот ва 7 та номинация билан тақдирланади.

2021 йилда матбуотда Узерли “Ажойиб туш” фильмидаги бош ролни Жулия Робертснинг бурни тагидан илиб кетгани ҳақида шов-шув тарқалади.

Севимли кино юлдузи билан учрашиш учун уйдан қочиб кетган икки бола ҳақида ҳикоя қилувчи сценарий дастлаб Голливуд юлдузи Жулия Робертс учун ёзилган. Бироқ кейинчалик турк актрисаси бу ролга кўпроқ мос келади, деб қарор қилинади, Марям ҳам ролга рози бўлади. Фильмга “Американинг номаълум тарихи” фильмида ишлаган Жон Моррисси продюсерлик қилади.

Ўша йили Марям иккинчи марта оналик қувончини ҳис қилиб, яна бир қизалоқни дунёга келтиради — унга Лили Кой деб исм қўяди.

Марям Узерлининг ҳикояси, албатта, шахсий ҳаётдаги қийин даврлар ҳам, муваффақиятсизликлар ҳам таслим бўлишга арзимаслигини ўргатади.