Собиқ Иттифоқнинг илк икки босқичли термоядро бомбаси ихтирочиларидан бири Григорий Клинишов Москвада ўз жонига қасд қилди. У 92 ёшда эди, деб ёзади “Regnum” ўз манбасига таяниб.
Агентлик хабарига кўра, муҳандис-физикнинг жасадини 17 июнь куни Замоскворече туманидаги хонадонидан яқинлари топган. У ўз жонига қасд қилишдан олдин хат қолдирган. Лекин хатда нималар ёзилгани ошкор қилинмади.
Григорий Емелянович Клинишов 1930 йил 30-октябрда туғилган. У физика-математика фанлари номзоди, 1962 йилда Ленин мукофоти лауреати бўлган. Марҳум олим Бутуниттифоқ экспериментал физика илмий-тадқиқот институтида термоядро қуролларини яратиш билан шуғулланган. Шунингдек, Клинишов биринчи совет икки босқичли термоядро бомбаси РДС-37 ни яратишда иштирок этган.
Маълумот учун, мазкур бомба синовлари 1955 йил 22 ноябрда Семипалатинск полигонида бўлиб ўтган. Шу куни дунёда биринчи марта қуввати 1 мегатондан ортиқ бўлган водород бомбаси синовдан ўтказилди. Ушбу синовлар 200 километрдан ортиқ радиусда бир қатор фожиали воқеаларга олиб келди. 59 та аҳоли пунктида бинолар вайрон бўлди, ўнлаб одамлар жароҳатланди. Портлаш марказидан 240 километр узоқликдаги радиусда уйларнинг ойналари сингани ва радиация даражасининг ошиши қайд этилди.
Григорий Емелянович кейинги авлод бомбалари учун бир неча турдаги термоядро зарядларини ҳам ишлаб чиққан.
Изоҳ (0)