Самарқанд вилояти Булунғур туманида 10 га яқин манзарали дарахт кесиб ташлангани аниқланганди. Экология, атроф-муҳитни муҳофаза қилиш ва иқлим ўзгариши вазирлиги ахборот хизмати ҳолат юзасидан қўшимча маълумот берди.
Унга кўра, вилоят Экология, атроф-муҳитни муҳофаза қилиш ва иқлим ўзгариши бошқармаси ишчи гуруҳи томонидан ҳолат юзасидан ўрганиш ишлари олиб борилди. Натижада Булунғур тумани ҳудудидан ўтувчи Тошкент—Самарқанд М-39-автомагистрал йўли ёқасида яшил белбоғ (ихота) шаклида экилган қарийб 50-55 йиллик 9 туп қайрағоч дарахтлари кесиб ташлангани маълум бўлди.
Ҳуқуқбузарлик оқибатида табиатга 744 миллион 642 минг сўм зарар келтирилган. Далилий ашёлар ва тегишли ҳужжатлар тўпланиб, ҳуқуқни муҳофаза қилувчи органларга тақдим этилди.
Изоҳ (0)