“Титаник” чўккан жойга экспедиция уюштирган OceanGate сувости кемаси ҳеч қайси назорат органи томонидан сертификатланмагани маълум қилинди

Атлантика океанида “Титаник” ҳалокатга учраган жойга саёҳат қилиб ғойиб бўлган сувости кемаси топилгани ҳақида хабар берилганди. Аммо кема ҳануз қидирилаётгани маълум бўлди. Daily Mail нашрининг ёзишича, ушбу кема бирорта тартибга солувчи орган томонидан сертификатланмаган.

“Титаник” ҳалокатга учраган жойни кўриш учун сайёҳлар OceanGate Expeditions компаниясининг кемасида қарийб 3 900 метр пастга тушади, улар сафар учун 250 минг доллардан тўлайди.

OceanGate Expeditions компанияси 2009 йилда ташкил этилган ва у ўнлаб йиллардан бери тадқиқотчи ва сайёҳларни денгиз тубига олиб тушиш билан шуғулланади. Аммо сувости кемасига чиқишдан аввал саёҳатчилар “Ушбу экспериментал кема ҳеч қандай тартибга солувчи орган томонидан тасдиқланмаган ёки сертификатланмаган. Сафар давомида жисмоний шикастланиш, руҳий жароҳат ёки ўлимга олиб келадиган ҳолатлар бўлиши мумкин” деган шартномани имзолаши керак.

CBS News Sunday мухбири Девид Пог, 2022 йилда OceanGate экспедициясида иштирок этган ва ўз тажрибалари ҳақида гапириб берган.

“Ушбу сувости кемаси ҳайратланарли даражада оддий. У қўлболадек туюлади. Уни бошқариш видео ўйин пульти билан амалга оширилади”, — деди у.

Погнинг айтишича, экспедициялар ниҳоятда хавфли эди. Сувости кемаси углерод толаси ва титандан ясалган бўлиб, денгиз остидаги кучли босимга чидашга мўлжалланган. У “она кема” билан матнли хабарлар орқали алоқада бўлади. 

“Титаник” вайроналарига етиб бориш учун одатда икки ярим соат вақт кетади. Ҳар бир экспедиция саккиз кун давом этади.

Йўқолган кема бортида беш киши, жумладан, Стоктон Раш компаниясининг бош директори ва асосчиси, сувости кемалари қўмондони Пол-Анри Нарголет ҳамда Action Aviation самолётларини сотиш ва эксплуатация қилувчи компания эгаси британиялик миллиардер Хемиш Хардинг бор эди.

Британиянинг “Титаник” кемаси ўз вақтида дунёдаги энг улкан кема ҳисобланиб, у 1912 йилнинг 14 апрелидан 15 апрелига ўтар кечаси Атлантика океанида айсбергга урилиб, чўкиб кетган. Оқибатда кема бортида бўлган одамларнинг 1 513 нафари ҳалок бўлган, 711 нафар инсон қутқариб қолинган.