Эрон терма жамоаси бош мураббийи Амир Ғаленои CAFA Nations Cup—2023 финали доирасида Ўзбекистонга қарши кечадиган баҳс олдидан ўз фикрлари билан ўртоқлашди.
Ўйин ҳақида
Ўзбек футболи ҳақида етарлича маълумотга эгамиз. Эрон терма жамоаси бош мураббийи сифатида 2006 йилда ҳам Ўзбекистонга қарши ўйин ўтказганман. Финалда яхши ўйин гувоҳи бўламиз деган умиддаман. Ўзбекистон ва Эрон Осиёнинг кучли жамоаларидан ҳисобланади. Умид қиламанки, томошабинлар ёрдамида яхши ўйин кўрамиз.
Сардор Азмуннинг ўйинда иштирок этиш масаласи ҳақида
Ҳозирча терма жамоа шифокорлари унинг ўйинда иштирок этиш масаласи борасида аниқ тўхтамга келмади. Айни вақтда у даволаниш жараёнида. Якуний қарорни ўйиндан олдин чиқарамиз. Футболчиларнинг саломатлиги биз учун энг муҳими.
Ўзи таниган ўзбек футболчилари ҳақида
Темур Кападзе ва Сервер Жепаровни алоҳида санаб ўтган бўлардим. Улар футболчи сифатида кўп ишларни амалга оширган, ҳозир эса мураббий сифатида ўзбек футболига ҳисса қўшмоқда.
Ўзбекистон терма жамоасининг кучли ва кучсиз томонлари борасида
Жамоа иккита схемада кўпроқ ҳаракат қилишини англадик: баъзида 3 ҳимоячи, баъзида эса 4 ҳимоячи билан ўйнайди. Охирги хулосаларни бугунги таҳлиллардан кейин чиқарамиз.
CAFA мусобақаси ҳақида
Аввало мусобақани ўтказаётган Қирғизистон ва Ўзбекистондаги ташкилотчиларга раҳмат айтаман. Умид қиламизки, кейинги мусобақаларда ташкилотчилик масаласи янада яхшиланади.
Ҳар бир ишнинг бошланиши қийин бўлади. Бу CAFAънинг дастлабки мусобақаларидан бири бўлгани учун табиийки камчиликлар бўлади. Ташкилотчиларга омад тилаймиз, кейинги мусобақаларда камчиликларни бартараф этишади деб ўйлайман.
Футболда асосий жиҳат иккита — ҳурмат ва ўйиндан олинадиган лаззат. Умид қиламизки, финалда мухлислар ўйиндан лаззат олади.
Амир Ғаленои, Эрон терма жамоаси бош мураббийи
Ўзбекистон ва Эрон миллий терма жамоалари ўртасидаги ўйин 20 июнь куни “Бунёдкор” стадионида бўлиб ўтади. Учрашув 20:30 да старт олади. Аввалроқ финал ўйинида россиялик ҳакамлар гуруҳи ишлаши борасида хабар берилганди.
Изоҳ (0)