Сўнгги бир неча кунда Ҳиндистондаги аҳолиси энг кўп икки штатда камида 96 киши жазирама оқибатида вафот этди, бутун мамлакат иссиқдан азият чекмоқда. Уттар-Прадеш ва Биҳар штатларида қарийб 45 градус ҳарорат қайд этилди, деб хабар бермоқда The Guardian нашри.
Ўлим ҳолатлари Уттар-Прадеш шимоли ва Биҳар шарқида кузатилган, у ерда расмийлар 60 ёшдан ошган аҳолини ва турли касалликлардан азият чекаётган бошқа одамларни кундузи уйда қолиш ҳақида огоҳлантирган.
Уттар-Прадеш штатидаги Баллия туманида 54 киши вафот этган. Расмийлар қурбонларнинг кўпчилиги 60 ёшдан ошганини ва тиббий шароит жазирама сабаб оғирлашганини аниқлади.
Баллиядаги тиббиёт ходими С.К. Ядавнинг айтишича, сўнгги уч кун ичида туман шифохонасига иссиқдан соғлиғи ёмонлашган 300 га яқин бемор ётқизилган. Тез ёрдам хонасига қўшимча кароватлар қўйилган.
Балли шаҳрида яшовчи Патак фамиляли фуқаро 17 июнь куни отасидан айрилганини айтди. У касалхонанинг тез ёрдам бўлимида беморлар ҳаддан зиёд эканига гувоҳ бўлган:
“Баллияда ҳеч қачон бундай бўлмаган. Мен бунчалик кўп одамлар иссиқдан ўлганини кўрмаганман. Одамлар кўчага чиқишга қўрқяпти. Йўллар ва бозорлар деярли ҳувиллаб қолган”.
Якшанба куни Баллия округида максимал ҳарорат 43 даражага чиқиб, нормадан 5 даража ошди. Ҳавонинг нисбий намлиги 25 фоиз бўлди, бу иссиқлик эффектини оширди.
Ҳиндистон метеорология департаменти ходими Атул Кумар Сингхнинг айтишича, ҳозир штат бўйлаб ҳаво ҳарорати меъёрдан юқори. У Уттар-Прадеш штатининг айрим ҳудудларида жазирама 19 июнгача давом этиши ҳақида огоҳлантирди.
Штат соғлиқни сақлаш вазири Брижеш Патҳакнинг айтишича, ўлим сабаблари бўйича текширув бошланган.
Изоҳ (0)