So‘nggi bir necha kunda Hindistondagi aholisi eng ko‘p ikki shtatda kamida 96 kishi jazirama oqibatida vafot etdi, butun mamlakat issiqdan aziyat chekmoqda. Uttar-Pradesh va Bihar shtatlarida qariyb 45 gradus harorat qayd etildi, deb xabar bermoqda The Guardian nashri.
O‘lim holatlari Uttar-Pradesh shimoli va Bihar sharqida kuzatilgan, u yerda rasmiylar 60 yoshdan oshgan aholini va turli kasalliklardan aziyat chekayotgan boshqa odamlarni kunduzi uyda qolish haqida ogohlantirgan.
Uttar-Pradesh shtatidagi Balliya tumanida 54 kishi vafot etgan. Rasmiylar qurbonlarning ko‘pchiligi 60 yoshdan oshganini va tibbiy sharoit jazirama sabab og‘irlashganini aniqladi.
Balliyadagi tibbiyot xodimi S.K. Yadavning aytishicha, so‘nggi uch kun ichida tuman shifoxonasiga issiqdan sog‘lig‘i yomonlashgan 300 ga yaqin bemor yotqizilgan. Tez yordam xonasiga qo‘shimcha karovatlar qo‘yilgan.
Balli shahrida yashovchi Patak familyali fuqaro 17-iyun kuni otasidan ayrilganini aytdi. U kasalxonaning tez yordam bo‘limida bemorlar haddan ziyod ekaniga guvoh bo‘lgan:
“Balliyada hech qachon bunday bo‘lmagan. Men bunchalik ko‘p odamlar issiqdan o‘lganini ko‘rmaganman. Odamlar ko‘chaga chiqishga qo‘rqyapti. Yo‘llar va bozorlar deyarli huvillab qolgan”.
Yakshanba kuni Balliya okrugida maksimal harorat 43 darajaga chiqib, normadan 5 daraja oshdi. Havoning nisbiy namligi 25 foiz bo‘ldi, bu issiqlik effektini oshirdi.
Hindiston meteorologiya departamenti xodimi Atul Kumar Singxning aytishicha, hozir shtat bo‘ylab havo harorati me’yordan yuqori. U Uttar-Pradesh shtatining ayrim hududlarida jazirama 19-iyungacha davom etishi haqida ogohlantirdi.
Shtat sog‘liqni saqlash vaziri Brijesh Pathakning aytishicha, o‘lim sabablari bo‘yicha tekshiruv boshlangan.
Izoh (0)