АҚШ Давлат котиби Пекинга келди. У Байден даврида Хитойга ташриф буюрган энг юқори мартабали америкалик амалдорга айланди

АҚШ Давлат котиби Энтони Блинкен икки кунлик ташриф билан Пекинга келди, деб хабар бермоқда Associated Press.

Сафар давомида АҚШ Давлат департаменти раҳбари Хитой ташқи ишлар вазири Син Ган ва, эҳтимол, Хитой раҳбари Си Цзиньпин билан учрашиши кутилмоқда.

Блинкен Хитойга февраль ойида ташриф буюриши керак эди, бироқ АҚШ ҳаво ҳудудида Хитой шари топилиб, уриб туширилгач, сафар кечиктирилди. Ўшанда Вашингтон Пекинни жосусликда гумон қилган.

Associated Press таъкидлаганидек, Блинкен Жо Байден 2021 йил январида президент бўлганидан буён Хитойга ташриф буюрган энг юқори мартабали АҚШ расмийсига айланди. У, шунингдек, сўнгги беш йил ичида Хитойга ташриф буюрган биринчи АҚШ Давлат котиби бўлди.

Энтони Блинкеннинг ташрифи АҚШ президенти Жо Байден ва Хитой раҳбари Си Цзиньпин ўртасидаги учрашувларга замин яратиши кутилмоқда. Аввалроқ Байден яқин ойларда Си билан учрашишга умид қилаётганини айтган.

• АҚШ ва Хитой ўртасидаги муносабатлар савдодан тортиб минтақавий хавфсизликкача бўлган бир қанча жабҳаларда, жумладан Тайван ва Россиянинг Украинага босқини бўйича келишмовчиликлар туфайли ёмонлашган.