Xonanda Malika Ravshanova “O‘zimizning gap” ko‘rsatuviga bergan intervyusida bolaligidagi qiyinchiliklar, onasi bilan og‘ir kunlarni boshdan kechirgani haqida gapirib berdi.
“Kechirmagan insonlarim qatorida eng yaqinlarim bor”
— Kechirolmaganlarim begona bo‘lganida bunchalik qalbim yaralanmas edi. Biroq kechirmagan insonlarim qatorida o‘zimning eng yaqinlarim bor. Dadam o‘tgan kundan boshlab, yetimlarning haqqini talon-taroj qilishgan, ularni kechira olmayman. Yetimning haqqi hech qachon hech kimda qolib ketmaydi. Bu narsa bizni tez ulg‘aytirdi.
“Maktabga sumka o‘rniga paket tutib borganman”
— Dunyoda yomon ona bo‘lmaydi. Bolasiga kimdir nimadir qilsa birinchi kuyib yonadigan ona bo‘ladi. Onamning ko‘p vaqti pul ishlab topishga ketardi. Gilam to‘qirdi, kashta tikardi, non yopardi, tikuvchilik qilardi. U erta sahar oltida ketib, kechki oltida qaytardi. Kuzda maktab uchun kerakli narsalarni olib beray, deb yozda ishlardi. Harakat qilardi, bir safar ishlab menga, keyin akamga o‘quv-qurol olib berardi. Ammo bir safar sumka olib berolmay, “Daftarlarni paketga solib borib turinglar”, degan.
“Dadam tushimda oldimga kelib, oyog‘imga etik kiydirib ketgan”
— Bir yili qish qattiq keldi, qor, yomg‘ir yog‘di. Oyog‘imda etik yo‘q edi, bola puli berilmasdi, keyin onam paket kiyib borasanmi, deb o‘ylangan. Etigimdan suv o‘tayotgan bo‘lsa ham maktabga borsam bo‘ldi, deb kiyib boraverganman. O‘shanda dadam tushimga kirgandi. U oldimga kelib, oyog‘imga etik kiydirib ketgan. O‘sha paytda bola bo‘lsam ham etigim yo‘q, deb xafa bo‘lmaganman. Hozir o‘ylab ko‘rsam, onamga oson bo‘lmagan ekan, — deydi xonanda Malika Ravshanova.
Izoh (0)