Раметовлар сулоласининг кенжа вакилли Азиз Раметов болалигидан санъаткорлар даврасида улғайган. Аммо ота-онаси унинг санъат вакили бўлишини исташмаган. Бўлажак актёрнинг ҳарбий соҳадан “қувилиши”, узоқ вақт уйланолмагани ва армонлари ҳақида ҳикоя қиламиз.
Азиз Раметов бошқаларга ўхшамайдиган характер эгаси. Қарангки, унинг дунёга келиши ҳам ноодатий бўлган экан. Бу ҳақида актёрнинг онаси Саида Раметова ҳикоя қилиб берган.
— Ҳаётимдаги энг ширин воқеалар айнан лифт билан боғлиқ. Турмушга чиқмасимдан аввал ошиқлар жуда кўп эди. Ҳамма йигитлар “Бу қиз жуда калондимоғ, ҳеч кимни менсимайдиган, ҳаммага йўқ-йўқ деб жавоб беради”, дейишган.
Жумадулла Раметов мен ҳақимда эшитгандан сўнг “Шунақами у, ана кўрасизлар, бу қизга мен уйланаман”, деган экан. У пайтда иккимиз ҳам ижодкорлар ётоқхонасида яшардик. Мен 9-қаватда, Жумадулла эса 7-қаватда турган. Асосий севгимиз ўша ерда бошланган. Мен ўқиб юрганимда ҳеч кимга қарамаганман. Эсимда бор, лифтга чиққанимда ортимдан чиқиб олган. Лифтдан тушишимга қўймаган. Шу вақтда улар менга севги изҳор қилиб, уйланишини айтганлар. 1988 йилда иккинчи фарзандим Азиз Раметов лифтда туғилган, — дейди Саида Раметова.
Азиз Раметов болаликдан санъат ичида ўсган. Аммо ота-онаси ўғилларининг санъаткор бўлишини исташмаган.
— Негадир ҳарбий бўлишимизни орзу қилишган. Аммо акам ҳам мен ҳам бу орзуларини амалга оширолмадик. Ҳозирги “Темурбеклар” ҳарбий мактабига биринчилардан бўлиб ўқишга кирганман. У пайтда бошқа номланар эди. Ўша пайтда Собир ака деган директор раҳбарлик қиларди. Бир куни ота-онамни олдига чақириб “Ўғлингиз аввалгидан анча яхши томонга ўзгарган. Аммо барибир бундай ҳарбий чиқмайди. Кун келиб чегарада турганда, иккита латифа эвазига ҳам сирларни сотиб юборадиган бола”, деб ҳазил қилганди. Шундан кейин ота-онам Эстрада ва цирк коллежида ўқишимга рухсат беришган. Унгача “Санъаткор бўлмайсан”, деб жиддий қаршилик қилишарди, — дейди Азиз Раметов.
Азиз Раметов болалигидан шўх ва ўйинқароғ йигит бўлган. Кўп ҳолларда жанжалларга аралашиб қолар, баъзан даҳанакилари ҳам жиддий тус оларди.
— Ўғил боланинг бошидан ҳар хил кунлар ўтади. Менимча, жанжаллар борасида ота-онамни безор қилган бўлсам керак. Бунинг учун улардан узр сўрайман. Ўзим жанжалкаш эмасдим, аммо негадир шунақа вазиятларга тушиб қолаверардим. Нафақат дўстни, таниш-билишни ҳам шунчаки қийин вазиятда ташлаб кетолмаслигим панд бергандир, — дейди Азиз Раметов.
“Она машҳур санъаткор бўлгани учун бу ҳам артист бўлди”, — бу гап қаҳрамонимизга жуда оғир ботгани ва анча вақтгача буни атрофдагилардан яширгани ҳақида сўзлаб берган.
— Онам “Урушсанг ёнингни олишим мумкин, аммо ҳеч битта режиссёрга ўғлимга рол беринг деб илтимос қилмайман”, деб шарт қўйган. Менимча, бу гапни ҳам санъаткор бўлмаслигим учун айтган. Сабабини билмайман-у, аммо ота-онам анча вақтгача мени санъатга бўлган қизиқишимни сўндирмоқчи бўлишган. Қамара Комолованинг фильмида суратга тушганмиз. Режиссёр билан учрашгани борганимизда мени онамга таништириб “Саида Раметова бу сизнинг ўғлингиз бўлади”, деган. Онам кулиб ҳа биламан ўғлим эканлигини деган. Режиссёр ҳақиқатни билгандан кейин “Нега айтмадинг?” деб юзимга енгил тарсаки туширганди. Ҳақиқатан ҳам ачна вақтгача кўпчилик Саида ва Жумадулла Раметовларнинг фарзанди эканлигимни билишмаган. Мен ҳам ҳамма қатори кастинг топшириб фильмларга тасдиқланганман, — дейди Азиз Раметов.
Актёр фаолияти давомидаги энг қийин ролни “Ўтов” фильмида ижро этгани ва ўлимни ҳис қилгани ҳақида сўзлаб берди.
— Ролларим ранг-баранг. Аслида ролни яратиш, бошқа инсон бўлиб яшаш осон эмас. Аммо менга энг қийин кечган ролни “Ўтов” фильмида яратганман. Бўйнимга қадар тупроққа кўмиб қўйишганида ўлим ҳиссини туйганман. Жуда қўрқинчли эди. Ҳатто, қўрққанимдан эртаси куни лабимга учиқ ҳам тошиб кетганди, — дейди актёр Азиз Раметов.
Азиз Раметов ўзини нафақат актёрликда, балки хонандалик ва режиссёрликда ҳам синаб кўрган. “Арслон изидан” ва “Қарамлик” номли фильмларни суратга олган. Аммо режиссёр фаолияти унга анча қимматга тушган.
— “Арслон изидан” экстремал жанрдаги фильм. Уни суратга олиш учун жуда катта маблағ сарфланган. Ҳатто миниб юрган машинасини сотиб ҳам фильмга тикканман. У пайтда жуда қизиққон, санъатдан бошқа ҳеч нарсани ўйламайдиган бола эдим. Ҳатто, маҳалла ичида реквизит қурол-яроқлар билан олинадиган саҳна бизга жуда қимматга тушган. Тегишли ташкилотларни огоҳлантирмаганимиз учун сёмка майдончасига махсус гуруҳ келиб, барчамизни қўлга олишган. Режиссёрликнинг кетидан бир неча кун қамоқда ҳам ўтириб чиққанман, —дейди актёр Азиз Раметов.
Актёр 2007 йили рус киноижодкорлари томонидан суратга олинган “Застава” фильмида сержант Раимжонов ролини ижро этган. Фильмдан сўнг унга продюсерлик компаниялари Россияда қолиб ижод қилишни таклиф этган.
— Ҳаётимдаги энг катта гонорарни ўша фильмдан олганман. Кунига 1 000 АҚШ долларидан пул тўлашган. Кейин уларда актёрлар агентлар ёрдамида ишлар экан. Менга ҳам бир нечта агентлик фирмалари алоқага чиқиб, ҳамкорликни таклиф этган. Улар билан ишлаш учун Россияда қолишим керак эди. Менда ватанпарварлик ҳисси юқорими билмадим, у ерда қолиб кетишни истамаганман, — дейди Азиз Раметов.
Азиз Раметов оила қурмасидан аввал топган пулини кайф-у сафога сарфлаганини яширмайди. Бу қарамликдан қандай қутилгани ва у ҳақида фильм суратга олиши кераклигини тушуниб етгани ҳам сўзлаб берган.
— Уч ойда 90 минг АҚШ доллари доромад топган пайтларим ҳам бўлган. Энг қизиғи, у пулларнинг бирортасини уйга олиб кирмаганман. Топган пулларимнинг баракаси йўқ эди, ёки уларни тўғри сарфлашни билмасдим. Ўйин-кулги, дўст-биродарликни яхши кўрардим. Маблағимни атрофдагилардан, дўстларимдан қизғонмасдим. Энг алам қиладигани шу кунгача ота-онамга “Манави пулни ишлаб топдим”, деган бола эмасман. Тўғри уйга рўзғорлик қилардим, аммо пул бермасдим. Шуларни ўйлаб ҳам уйланишим кераклигини англаб етдим.
Бугунги кунга турли қарамликка берилган ёшлар жуда кўп. Бундай инсонларнинг кўпи билан танишман. Улар руҳан қийналади, аммо бу вазиятдан чиқиб кетишга ўзида куч тополмайди. “Қарамликдан қутилиб ҳаётимни ўзгартираман”, деган инсонларни қўллаб-қувватлаш мақсадида “Қарамлик” номли фильмни суратга олдим. Уни кўриб ёшлар ўзларига тегишли хулоса олишади деб ўйлайман, — дейди Азиз Раметов.
Ижодкор шу кунгача бирорта мукофотни қўлга киритмагани ва ҳатто “Ниҳол” номидаги давлат мукофотини пул бериб бўлса-да, олмоқчи бўлгани ҳақида сўзлаб берган.
— Меҳнатимиздан фойдаланишади. Тўғри шунга яраша пулни ҳам оламиз. Аммо ижодкорга мотивация бериб туриш керак. Ўттиз минг сўмлик фахрий ёрлиққа ташаккурнома ёзиб беришса ҳам одамнинг кўнгли қанчалик кўтарилади. Шу кунгача бирорта мукофотни қўлга киритганим йўқ. Негадир бу нарса жуда алам қилади. Ҳатто бир йили “Ниҳол”ни олиш учун пора ҳам берганман, аммо мендан пулни олган ака фирибгар бўлиб чиққан. Онам ҳам шунча йилдан бери санъат ва маданият соҳасини риовжлантириш учун хизмат қилади. Аммо ҳалигача Халқ артисти бўлолгани йўқ. Унинг шогридлари ёки ундан кейин саҳнага чиққанлар аллақачон бундай мукофотларни қўлга киритиб бўлишди, — дейди Азиз Раметов.
Азиз Раметов 2022 йилнинг март ойида Шаҳло Умарова исмли қиз билан оила қурди. Уларнинг тўйи ҳақиқий шов-шувга айланди десак муболаға бўлмайди. Йил якунида улар ота-она бўлиш бахтига мушарраф бўлишди. Бахтли жуфтлик ўғлига Муҳаммадамин деб исм қўйишган.
Изоҳ (0)