Ҳиндистон бош вазири Нарендра Модининг Вашингтонга давлат ташрифи олдидан АҚШ президенти Жо Байден маъмурияти Нью-Деҳлини Американинг MQ-9B SeaGuardian дронларини сотиб олиш бўйича йирик ҳарбий шартномани имзолашга ундамоқда. Бу ҳақда Reuters манбаларга таяниб хабар берди.
Манбаларнинг айтишича, АҚШ Давлат департаменти, Пентагон ва Оқ уй Ҳиндистондан Модининг 22 июндаги ташрифи чоғида 30 та General Atomics дронларини сотиб олиш бўйича келишувда “олдинга силжишни” сўраган. Аммо кейинроқ дронлар сони 24 тага, ундан кейин 18 тага қисқартирилган.
Бир неча йил амал қилиши кутилаётган келишув суммаси 2-3 миллиард долларга етиши мумкин. Шу билан бирга, Ҳиндистон MQ-9B SeaGuardian компонентларининг бир қисмини ўз ҳудудида ишлаб чиқариш шартини қўймоқда, деб ёзади Reuters.
MQ-9B SeaGuardian денгизга асосланган разведкачи дрон ҳавода 30 соатдан ортиқ тура олади. Ишлаб чиқарувчининг веб-сайтида айтилишича, ушбу дрон бир қатор денгиз операциялари, жумладан, сувости кемаларига қарши мудофаа ёки гуманитар миссиялар учун ҳам ишлатилиши мумкин.
Агентлик қайд этишича, ҳозирда Қўшма Штатлар, Ҳиндистон, Австралия ва Япония MQ-9B SeaGuardian дронларидан фойдаланади. Улар орасида Ҳиндистон разведка маълумотларини йиғиш операциялари учун бундай дронларнинг бир нечтасини ижарага олган.
Изоҳ (0)