Токио Паралимпия ўйинлари кумуш медали совриндори Асила Мирзаёрова “Дарё” билан суҳбатда бўлди. Асила ҳаётидаги қийинчиликлар, спортга кириб келиши ва қисқа муддатда кўзга кўринарли натижаларга эришгани ҳақида гапириб ўтди.
Болалиги ҳақида
Болалигим Қашқадарёнинг Қарши шаҳрида ўтган. Ёшлигимдан жуда кўп қизиқишларим бўлган. Мактабда ўқиб юрган вақтларим, мусиқа мактабига ҳам борардим. Шунингдек, каратэ спорт тури билан ҳам шуғулланганман.
Қийинчиликлар, руҳий босимлар ҳақида
Оромгоҳдаги воқеадан кейин ҳаётимда кутилмаган вазият бўлган. Албатта, қийинчиликлар бўлган, ёлғизланиб қолганман. Аввал кўп спорт турларига қизиққанман, ундан кейин эса нима қилиш ҳақида кўп ўйладим. Оилам билан биргаликда бу қийинчиликларни енгиб ўтдик, Секин-секин йиллар давомида кўникишни бошладим. Шундан сўнг яна спортга қайтдим.
Спортни танлашига сабаб бўлган омил ҳақида
Бу спорт турини танлашимга дадам сабабчи бўлган. Дадам бир куни Паралимпия спорти ҳақида айтди. Дастлаб, бу спорт тури ҳақида билмаганим учун “йўқ” жавобини берганман. Инсон кўрмай туриб, ҳеч нарса қила олмайди, деб ўйлаганман. Кейинчалик танишиб, шароитлари зўрлигини билганимдан кейин шуғулланишни бошлаганман.
Югуриш спорт туридан узунликка сакрашга ўтгани ҳақида
Биринчи югуриш спорт туридан бошлаганман. 100 метр, 200 метр масофаларга югуришга қўйишган. Бироқ, катта мусобақаларда мен учун медал қўлга киритиш қийин эди. Чунки ёшим жуда кичик эди. Кейин узунликка сакрашга ўтдим. Бу спорт турида медал олишга имкониятим бор эди. Шундан буён узунликка сакраш спорт тури билан шуғулланаман, Токиодаги Паралимпия ўйинларида ҳам кумуш медални қўлга киритдим.
Мураббийлари ҳақида
Мураббийларим кўп. Сардор Худойберганов, Сардор Абдухолиқов ва Раҳмон Жумаевич каби мураббийларим мен билан алоҳида машғулотлар ўтказади. Бир мураббийим жисмоний ҳолатимизга қараса, бир мураббийим югуриш бўйича машғулотлар ўтказади. Яна бир устозим эса узунликка сакраш бўйича билимларни улашади. Энг асосий мураббийим — Сардор ака. У киши машғулотларда нима мени қийнаса, ўша нарсаларни тушунтириб беради. Ҳар бир мураббийим қаттиққўл, ўзлари айтган натижаларни талаб қилиб олади. Менинг шу даражагача чиқишимга уларнинг ҳар бирининг ўрни бор.
Илк мусобақаси ҳақида
Биринчи катта мусобақам Ёшлар Пара Осиё ўйинлари бўлган. 18 ёшимда 20 ёшгача бўлган спортчилар ўртасида югуриш ва узунликка сакраш бўйича мусобақада иштирок этганман. Тўғрисини айтсам, қўрққанман. Қандай натижа қайд этаман, ютаманми ё ютқазаманми деган иккиланишлар бўлган. Лекин борганимдан сўнг, учаласидан ҳам биринчи ўринни олиб қайтганман. Кейин ўзимга нисбатан ишончим ортишни бошлаган.
Токио Паралимпия ўйинлари ҳақида
Токиодаги ўйинлар ҳаётимдаги энг асосий ва энг катта мусобақа бўлди. Олимпиада ўйинлари ҳар доим биринчи ўринда туради. Унда иштирок этишни ўзи бўлмайди. Лицензияни қўлга киритиш учун қанчадан-қанча меҳнат қилиш керак. Кучли учликка киришни ўзи осон эмас. Ҳаяжон бўлган. “Мана шу ердан медал олиб кетишим керак”, деган нарса ичимда кучлилик қилган. Охиригача ҳаракат қилганман, афсус, 9 см етмасдан, иккинчи ўринни қўлга киритганман.
Қисқа муддатда сезиларли натижаларга эришгани ҳақида
Қисқа муддатда узунликка сакрашдан кумуш медални қўлга киритишим ортида жуда катта қийинчилик ётибди. Буни фақат мен, мураббийларим ва ёнимдаги инсонлар билади. Жуда қаттиқ меҳнат қилганмиз, ҳар бир нарса устида ишланган.
Спорт нималар бергани ҳақида
Спорт менга ҳамма нарсани берди. Биринчи навбатда, умидсизликка тушишдан қутқарган. Ўзимга бўлган ишончни қайтарган. Олдингига нисбатан анча руҳий ҳолатимни тиклаб олганман. Спортнинг менга берган энг катта нарсаси шу.
Спортдан ташқари қизиқишлари ҳақида
Спортдан ташқари пианино чалишга қизиқаман. Ҳозир ҳам зериккан пайтларим пианино чаламан.
Ўзбекистон Паралимпия Қўмитаси ҳақида
Қўмитада ҳамма шароитлар бор. Паралимпия спортчиларига нима керак бўлса, ҳамма нарса билан таъминланмоқда. Тошкентда жойлашган бинода ётоқхона ҳам, ошхона ҳам, икки-учта заллар ҳам мавжуд.
Ўзбекистон президенти Шавкат Мирзиёев билан учрашуви ҳақида
Шавкат Мирзиёев билан тўртинчи бор кўришдим. Аввалгиларида юрагимдаги гапларни айтмоқчи бўлганман, лекин вазият бўлмаган. Яқинда сайловолди дастурида Шавкат Мирзиёев билан кўришиш имконияти бўлди, ичимдаги миннатдорчилигимни билдириб олдим.
Узунликка сакраш бўйича энг яхши натижаси ҳақида
Ҳозир энг яхши натижам — 5 метр-у 21 сантиметр. Яқинда бўлиб ўтган саралаш ўйинларида бу натижани қайд этдим. Энди натижаларни бундан-да яхшироқ қилмоқчиман.
Жаҳон чемпионатига тайёргарлик ҳақида
Жаҳон чемпионатига тайёргарлик Паралимпия ўйинларидан ҳам кучлироқ кетмоқда. Чунки биз биринчи ўринга даъвогарларданмиз. Бразилия ва Хитойдан энг кучли рақибларим бор. Айнан улар билан биринчи ўрин учун кураш боради. 8 июль санасида чемпионатдаги иштирокимни бошлайман.
Ҳеч қачон таслим бўлмаслик ҳақида
Имконияти чекланганми, чекланмаганми, мени эшитиб турган инсонларга умуман тўхтамасликларини айтган бўлардим. Бир куни ҳаммаси яхши бўлиб кетади. Чунки меҳнат ҳеч қачон мукофотсиз қолиб кетмайди. Ҳеч қачон умидсизликка тушмасдан, яхши ният билан ҳаракат қилиш зарур.
Асила Мирзаёрова, Токио Паралимпия ўйинлари совриндори
Изоҳ (0)