Tokio Paralimpiya o‘yinlari kumush medali sovrindori Asila Mirzayorova “Daryo” bilan suhbatda bo‘ldi. Asila hayotidagi qiyinchiliklar, sportga kirib kelishi va qisqa muddatda ko‘zga ko‘rinarli natijalarga erishgani haqida gapirib o‘tdi.
Bolaligi haqida
Bolaligim Qashqadaryoning Qarshi shahrida o‘tgan. Yoshligimdan juda ko‘p qiziqishlarim bo‘lgan. Maktabda o‘qib yurgan vaqtlarim, musiqa maktabiga ham borardim. Shuningdek, karate sport turi bilan ham shug‘ullanganman.
Qiyinchiliklar, ruhiy bosimlar haqida
Oromgohdagi voqeadan keyin hayotimda kutilmagan vaziyat bo‘lgan. Albatta, qiyinchiliklar bo‘lgan, yolg‘izlanib qolganman. Avval ko‘p sport turlariga qiziqqanman, undan keyin esa nima qilish haqida ko‘p o‘yladim. Oilam bilan birgalikda bu qiyinchiliklarni yengib o‘tdik, Sekin-sekin yillar davomida ko‘nikishni boshladim. Shundan so‘ng yana sportga qaytdim.
Sportni tanlashiga sabab bo‘lgan omil haqida
Bu sport turini tanlashimga dadam sababchi bo‘lgan. Dadam bir kuni Paralimpiya sporti haqida aytdi. Dastlab, bu sport turi haqida bilmaganim uchun “yo‘q” javobini berganman. Inson ko‘rmay turib, hech narsa qila olmaydi, deb o‘ylaganman. Keyinchalik tanishib, sharoitlari zo‘rligini bilganimdan keyin shug‘ullanishni boshlaganman.
Yugurish sport turidan uzunlikka sakrashga o‘tgani haqida
Birinchi yugurish sport turidan boshlaganman. 100 metr, 200 metr masofalarga yugurishga qo‘yishgan. Biroq, katta musobaqalarda men uchun medal qo‘lga kiritish qiyin edi. Chunki yoshim juda kichik edi. Keyin uzunlikka sakrashga o‘tdim. Bu sport turida medal olishga imkoniyatim bor edi. Shundan buyon uzunlikka sakrash sport turi bilan shug‘ullanaman, Tokiodagi Paralimpiya o‘yinlarida ham kumush medalni qo‘lga kiritdim.
Murabbiylari haqida
Murabbiylarim ko‘p. Sardor Xudoyberganov, Sardor Abduxoliqov va Rahmon Jumayevich kabi murabbiylarim men bilan alohida mashg‘ulotlar o‘tkazadi. Bir murabbiyim jismoniy holatimizga qarasa, bir murabbiyim yugurish bo‘yicha mashg‘ulotlar o‘tkazadi. Yana bir ustozim esa uzunlikka sakrash bo‘yicha bilimlarni ulashadi. Eng asosiy murabbiyim — Sardor aka. U kishi mashg‘ulotlarda nima meni qiynasa, o‘sha narsalarni tushuntirib beradi. Har bir murabbiyim qattiqqo‘l, o‘zlari aytgan natijalarni talab qilib oladi. Mening shu darajagacha chiqishimga ularning har birining o‘rni bor.
Ilk musobaqasi haqida
Birinchi katta musobaqam Yoshlar Para Osiyo o‘yinlari bo‘lgan. 18 yoshimda 20 yoshgacha bo‘lgan sportchilar o‘rtasida yugurish va uzunlikka sakrash bo‘yicha musobaqada ishtirok etganman. To‘g‘risini aytsam, qo‘rqqanman. Qanday natija qayd etaman, yutamanmi yo yutqazamanmi degan ikkilanishlar bo‘lgan. Lekin borganimdan so‘ng, uchalasidan ham birinchi o‘rinni olib qaytganman. Keyin o‘zimga nisbatan ishonchim ortishni boshlagan.
Tokio Paralimpiya o‘yinlari haqida
Tokiodagi o‘yinlar hayotimdagi eng asosiy va eng katta musobaqa bo‘ldi. Olimpiada o‘yinlari har doim birinchi o‘rinda turadi. Unda ishtirok etishni o‘zi bo‘lmaydi. Litsenziyani qo‘lga kiritish uchun qanchadan-qancha mehnat qilish kerak. Kuchli uchlikka kirishni o‘zi oson emas. Hayajon bo‘lgan. “Mana shu yerdan medal olib ketishim kerak”, degan narsa ichimda kuchlilik qilgan. Oxirigacha harakat qilganman, afsus, 9 sm yetmasdan, ikkinchi o‘rinni qo‘lga kiritganman.
Qisqa muddatda sezilarli natijalarga erishgani haqida
Qisqa muddatda uzunlikka sakrashdan kumush medalni qo‘lga kiritishim ortida juda katta qiyinchilik yotibdi. Buni faqat men, murabbiylarim va yonimdagi insonlar biladi. Juda qattiq mehnat qilganmiz, har bir narsa ustida ishlangan.
Sport nimalar bergani haqida
Sport menga hamma narsani berdi. Birinchi navbatda, umidsizlikka tushishdan qutqargan. O‘zimga bo‘lgan ishonchni qaytargan. Oldingiga nisbatan ancha ruhiy holatimni tiklab olganman. Sportning menga bergan eng katta narsasi shu.
Sportdan tashqari qiziqishlari haqida
Sportdan tashqari pianino chalishga qiziqaman. Hozir ham zerikkan paytlarim pianino chalaman.
O‘zbekiston Paralimpiya Qo‘mitasi haqida
Qo‘mitada hamma sharoitlar bor. Paralimpiya sportchilariga nima kerak bo‘lsa, hamma narsa bilan ta’minlanmoqda. Toshkentda joylashgan binoda yotoqxona ham, oshxona ham, ikki-uchta zallar ham mavjud.
O‘zbekiston prezidenti Shavkat Mirziyoyev bilan uchrashuvi haqida
Shavkat Mirziyoyev bilan to‘rtinchi bor ko‘rishdim. Avvalgilarida yuragimdagi gaplarni aytmoqchi bo‘lganman, lekin vaziyat bo‘lmagan. Yaqinda saylovoldi dasturida Shavkat Mirziyoyev bilan ko‘rishish imkoniyati bo‘ldi, ichimdagi minnatdorchiligimni bildirib oldim.
Uzunlikka sakrash bo‘yicha eng yaxshi natijasi haqida
Hozir eng yaxshi natijam — 5 metr-u 21 santimetr. Yaqinda bo‘lib o‘tgan saralash o‘yinlarida bu natijani qayd etdim. Endi natijalarni bundan-da yaxshiroq qilmoqchiman.
Jahon chempionatiga tayyorgarlik haqida
Jahon chempionatiga tayyorgarlik Paralimpiya o‘yinlaridan ham kuchliroq ketmoqda. Chunki biz birinchi o‘ringa da’vogarlardanmiz. Braziliya va Xitoydan eng kuchli raqiblarim bor. Aynan ular bilan birinchi o‘rin uchun kurash boradi. 8-iyul sanasida chempionatdagi ishtirokimni boshlayman.
Hech qachon taslim bo‘lmaslik haqida
Imkoniyati cheklanganmi, cheklanmaganmi, meni eshitib turgan insonlarga umuman to‘xtamasliklarini aytgan bo‘lardim. Bir kuni hammasi yaxshi bo‘lib ketadi. Chunki mehnat hech qachon mukofotsiz qolib ketmaydi. Hech qachon umidsizlikka tushmasdan, yaxshi niyat bilan harakat qilish zarur.
Asila Mirzayorova, Tokio Paralimpiya o‘yinlari sovrindori
Izoh (0)