Экология, атроф-муҳитни муҳофаза қилиш ва иқлим ўзгариши вазирига ўринбосарлари тайинланди. Бу ҳақда вазирлик матбуот хизмати хабар берди.
.jpg)
Обиджон Қудратов вазирнинг биринчи ўринбосари лавозимига тайинланди. Бунга қадар у табиат ресурслари вазирининг биринчи ўринбосари бўлган.
Жусипбек Казбеков эса вазирининг ўринбосари лавозимига тайинланди. Бунга қадар у табиат ресурслари вазирининг ўринбосари лавозимида фаолият юритган.
Нарзулло Обломуродов бошқа ишга ўтиши муносабати билан табиат ресурслари вазири ўринбосари лавозимидан озод этилди. У 2022 йилнинг 30 декабридан буён ушбу лавозимда ишлаб келаётганди.
Шунингдек, Низомиддин Бакиров Табиат ресурслари вазирлиги ҳузуридаги Ўрмон хўжалиги агентлиги директори лавозимидан олиниб, Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Ўрмон хўжалиги агентлиги директори лавозимига тайинланди. Шерзод Ҳабибуллаев эса Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Гидрометеорология хизмати агентлиги директори этиб тайинланди ва Табиат ресурслари вазирлиги ҳузуридаги Гидрометеорология хизмати агентлиги директори лавозимидан озод этилди.
Президентнинг “Янги Ўзбекистон маъмурий ислоҳотларини амалга ошириш чора-тадбирлари тўғрисида”ги фармони билан 2023 йил 1 январдан Вазирлар Маҳкамаси таркибидаги вазирликлар 25 тадан 21 тага қисқартирилганди. Фармонга мувофиқ Экология ва атроф-муҳитни муҳофаза қилиш қўмитаси Табиат ресурслари вазирлигига айлантирилганди. 2023 йил 31 майдаги президент фармони билан Табиат ресурслари вазирлиги Экология, атроф-муҳитни муҳофаза қилиш ва иқлим ўзгариши вазирлиги деб қайта номланди.
Изоҳ (0)