O‘zbekiston prezidentining 31-maydagi farmoni bilan Tabiat resurslari vazirligi Ekologiya, atrof-muhitni muhofaza qilish va iqlim o‘zgarishi vazirligi deb qayta nomlandi. Bu haqda “Huquqiy axborot” Telegram-kanali xabar berdi.

Farmon bilan Ekologiya, atrof-muhitni muhofaza qilish va o‘rmon xo‘jaligi sohasidagi qonunchilikka rioya etilishi va uning ijrosi ustidan nazoratga mas’ul bo‘lgan Bosh prokuror o‘rinbosari lavozimi kiritildi. Vazirlikda alohida yuridik shaxs maqomiga ega bo‘lmagan Davlatekologiya nazorat inspeksiyasi tashkil etildi.

Prezidentning “Yangi O‘zbekiston ma’muriy islohotlarini amalga oshirish chora-tadbirlari to‘g‘risida”gi farmoni bilan 2023-yil 1-yanvardan Vazirlar Mahkamasi tarkibidagi vazirliklar 25 tadan 21 taga qisqartirilgandi. Farmonga muvofiq Ekologiya va atrof-muhitni muhofaza qilish qo‘mitasi Tabiat resurslari vazirligiga aylantirilgandi.

1-fevral kuni Tabiat resurslari vazirligida qator tayinlovlar amalga oshirilgandi. Obidjon Qudratov tabiat resurslari vazirining birinchi o‘rinbosari lavozimiga, Jusipbek Kazbekov tabiat resurslari vaziri o‘rinbosari lavozimiga, Rasul Kusherbayev tabiat resurslari vazirining maslahatchisi lavozimiga, Sherzod Habibullayev vazirlik huzuridagi Gidrometeorologiya xizmati agentligi direktori lavozimiga tayinlangandi.